Mangësi në mbledhjen e të ardhurave, detyrime të papaguara, probleme në investimet publike dhe shkelje në zbatimin e kontratave janë disa nga problematikat kryesore të evidentuara nga Kontrolli i Lartë i Shtetit (KLSH) në raportin vjetor për vitin 2025, prezantuar në Komisionin për Ekonominë, Punësimin dhe Financat nga kreu i institucionit, Arben Shehu.
Nga 190 auditime të kryera, 8 u dërguan për ndjekje penale. Në shumicën e subjekteve janë konstatuar pasaktësi në pasqyrat financiare, nivel i lartë i debitorëve të paarkëtuar, vonesa në rimbursimin e TVSH-së dhe mangësi në monitorimin e kontratave publike. Shehu vuri në dukje se pasqyrat financiare vjetore dhe transaksionet financiare nuk janë hartuar dhe dorëzuar sipas kërkesave ligjore, dhe se gjatë periudhës raportuese mungon një kuadër i plotë rregullator për raportimin financiar në sektorin publik. Në një seri subjektesh u vunë re mosrespektim afatesh ligjore, probleme në rakordimin dhe plotësinë e pasqyrave financiare, keqklasifikim të të ardhurave dhe shpenzimeve dhe regjistrim i pasaktë i detyrimeve, si dhe nivel i lartë i debitorëve të paarkëtuar.
Një tjetër çështje e theksuar ishte administrimi i të ardhurave tatimore. KLSH konstatoi vonesa në përfundimin e kontrolleve tatimore, pasaktësi në trajtimin e gjobave dhe mangësi në administrimin e të dhënave që kanë sjellë të ardhura të munguara në buxhetin e shtetit. Shehu deklaroi se në administrimin dhe mbledhjen e të ardhurave tatimore janë evidentuar problematika, duke përmendur rimbursime të vonuara të TVSH-së që krijojnë detyrime të prapambetura. Në drejtoritë rajonale tatimore u identifikuan pasaktësi që ndikojnë në të ardhurat buxhetore.
Sa i përket të ardhurave doganore, auditimet evidentuan probleme të tilla si TVSH në import dhe renta minerare; borxhi doganor ka shënuar rritje dhe përbëhet nga detyrime të vjetra. Gjatë vitit 2025, KLSH konstatoi një dëm ekonomik dhe financiar prej 26.2 miliardë lekësh. Auditimet u zhvilluan në 271 subjekte publike, përfunduan me 222 opinione auditimi dhe 4,994 rekomandime.
