Gjatë një fjalimi rreth investimit në Zvërnec, që zgjati mbi një orë dhe u mbajt gjatë mbledhjes së grupit parlamentar socialist, kryeministri Edi Rama iu përgjigj për herë të parë edhe Fatos Lubonjës. Rama tha se respektonte vuajtjet e Lubonjës në diktaturë, por nuk pranonte gjuhën që përdor tani analisti. Ai përmendi se nuk pranon “berihasë” të Lubonjës dhe akuzat për një “mafi” që, sipas Ramës, Lubonja i tregon si kundërshtarë, duke krahasuar këtë mënyrë të portretizimit me ata që dikur shënjonin “armikun e popullit”.
Rama tha: “Të shoh ju të shkoni pas berihasë të Fatos Lubonjës që jeton me makthin e mafies që kur u nda prej meje, unë nuk e pranoj, respekt për atë si person, për vuajtjet e tij, por mafien që ai më tregon mua, ma tregon sepse është njësoj si ata që i tregonin atij armikun e popullit, njësoj e njëjta gjë. Doni? E keni dhe atë. Që të mos them dhe për ata të tjerët që rrinë fshehur, që thonë ishalla po çohen ata që e kanë mbështetur Ramën edhe po shkojnë pas berihasë se nuk e mundim dot. Nuk ka nevojë të më mundni fare!”
Ai deklaroi se betejën e ka “bashkë me ju” dhe se pyetja kryesore është çfarë niveli duam për Shqipërinë lidhur me projektin për Zvërnec, i cili sipas tij ende nuk është dorëzuar. Rama tha se do të shikojnë dhe do të ekspozojnë projektin kur të vijë koha, për të kuptuar se çfarë do të bëhet. Sipas tij, veprimet e disa njerëzve janë diçka që në Europë dhe Mesdhe nuk shihet, dhe pyeti pse duhet të shikojnë me zili Greqinë apo Malin e Zi, duke shtuar se Sveti Stefan ishte “monument kulture”.
Rama theksoi nevojën për një turizëm që sjell më shumë para, por saktësoi: “Jo për mua o Fatos, jo për mua!” Ai tha se është i informuar që nga fëmijëria se kur ikën nga kjo botë nuk ka as cash e as kartë krediti, dhe citoi mësimin e të atit se e vetmja gjë që vlen është çfarë lë pas për kuptim. Në këtë kuadër, Rama deklaroi se nuk e lë dot turizmin e masës si pjesë të misionit të tij dhe shprehu dëshirën të lërë gjëra me të cilat gjeneratat e ardhshme të jenë krenare.