Kryeministri Edi Rama bëri një përmbledhje të zhvillimeve kryesore të javës, me theks tek ecuria e Shqipërisë në procesin e integrimit europian, forca e rolit të vendit në sigurinë euroatlantike dhe mbështetja për ekonominë dhe sipërmarrjen shqiptare. Ai vlerësoi vizitat në Gjermani dhe Estoni, progresin në prokurimet publike dhe digjitalizimin, programin “Dyfisho Sipërmarrjen Tënde” për NVM-të dhe konsensusin në Kuvend për rezolutën mbi anëtarësimin në BE si hapa të rëndësishëm për të ardhmen europiane dhe zhvillimin e vendit.
Rama pohoi se të dhënat tregojnë një përmirësim të dukshëm në fushën e prokurimeve publike, duke argumentuar se Shqipëria shfaqet si e transformuar pozitivisht dhe me progres domethënës nga vlerësimet europiane. Sipas tij, Shqipëria renditet e para në rajon në treguesit e prokurimeve publike dhe në disa indikatorë shfaqet mbi mesataren e vendeve të Bashkimit Europian. Ai solli si shembull se përqindja e procedurave me një ofertues në vendet e BE-së është mbi 32%, ndërsa në Shqipëri rezulton 23.5%, dhe në prokurimet për punë publike bie në 12%.
Kryeministri theksoi gjithashtu se lufta kundër korrupsionit shtrihet përtej procedurave gjyqësore, duke përfshirë modernizimin e shtetit dhe ndërtimin e sistemeve që e reduktojnë prezencën e korrupsionit. Si pjesë të këtij procesi, ai nënvizoi përparimin në digjitalizimin e shërbimeve publike: 95% e shërbimeve për qytetarët ofrohen tashmë në platformën e-Albania, çka sipas tij ka eliminuar pritjet dhe prakstikat e ryshfetit dhe ka mundësuar marrëdhënie më direkte me shtetin.
Rama shprehu krenari që Shqipëria përmendet si një shembull pozitiv nga vlerësuesit ndërkombëtarë, duke kundërshtuar sipas tij pasqyrat e deformuara të kritikëve subjektivë dhe politikë. Në fjalën e tij u nënvizua gjithashtu rëndësia e vazhdimit të reformave dhe konsensusit të brendshëm për të avancuar në rrugën e integrimit europian dhe zhvillimit ekonomik.
