Kryeministri Edi Rama reagoi sërish pas publikimit që rendit Shqipërinë e para në botë me 98.33 pikë në National Cyber Security Index (NCSI). Duke iu përgjigjur dyshimeve dhe kritikave në rrjetet sociale, Rama tha se asnjë reagim nuk ndryshon renditjen e tabelës.
Në postimin e tij, ai iu drejtua me tone të ashpra kritikëve, të cilët i quajti “urrejtës”, “trolla” dhe i krahasoi me “sorra” e “korb”, duke vënë në dyshim energjinë që ata shpenzojnë për të kundërshtuar lajmin. Rama argumentoi se renditjen në NCSI nuk e vendosin “trollët” por një metodologji ndërkombëtare, e cila matet mbi kuadrin ligjor, kapacitetet institucionale dhe sistemin e parandalimit. Ai shtoi se mllefi dhe sulmet e kundërshtarëve nuk mund ta ndryshojnë tabelën.
Kryeministri vijoi me tone të përçmuara ndaj atyre që sipas tij janë të pakënaqur me avancimin e Shqipërisë, duke thënë se mund t’u bëjë “dhimbje” faktin që vendi doli në krye “pikërisht në aftësinë mbrojtëse nga trollimet malinje”. Ai u shpreh se çdo koment negativ është për të vetëm një klik më shumë, një provë më shumë dhe një buzëqeshje më shumë në ditën e këtij arritjeje.
Rama theksoi se miqtë dhe aleatët e vërtetë e uruan për këtë vlerësim, ndërsa sipas tij “dështakzemërakët e Shqipërisë” e sulmuan; të dy palët, tha ai, në mënyrën e tyre konfirmuan të njëjtën gjë: Shqipëria u ngjit në majë aty ku më parë ishte në fund. Në përfundim të postimit, ai sulmoi ata që, sipas tij, dëshirojnë që vendi të mbetet në fund dhe që imagjinojnë skenarë si revolucione, dorëheqje apo marrje pushteti, duke përmendur edhe “diasporë nga Prishtina e Tetova” si objekt talljeje.
Postimi i tij përfshinte edhe një grafik që shfaq vlerësimin NCSI, ndërsa teksti i lajmit publikohet nga Top Channel.
