Kryeministri Edi Rama njoftoi se javën e ardhshme do të krijohet Ministria e Administratës Publike. Ai argumentoi se vendosja e një institucioni të tillë është përgjigje ndaj rëndësisë që ka marrë administrata publike në punën e qeverisë dhe në procesin e integrimit europian të Shqipërisë. “Do të krijojmë javën e ardhshme Ministrinë e Administratës Publike, pikërisht sepse tanimë tema e administratës publike është një temë shumë qendrore e punës së qeverisë, por është një temë shumë qendrore edhe e shtetbërjes së mëtejshme europiane të Shqipërisë”, u shpreh Rama.
Sipas kryeministrit, përmes ministrisë së re synohet zgjerimi i përgjegjësive dhe i objektivave për modernizimin e administratës. Rama theksoi se synimi është të adoptohen modele që zbatohen në vende të tjera europiane, duke zgjeruar gamën e detyrave, të punëve dhe të ambicieve për të ngritur më lart shtetin europian të shqiptarëve. Ai e përshkroi ministrinë si një mjet për të rritur kapacitetet institucionale dhe për të përshpejtuar proceset e reformimit të administratës, me referencë ndaj praktikave evropiane që shërbejnë si model.
Kreu i qeverisë la të kuptohej se drejtimi i institucionit të ri do t’i besohet ministres së Shtetit për Administratën Publike, Adea Pirdeni, duke e konsideruar atë si zgjedhjen e duhur për të vijuar këtë proces. “Në këndvështrimin tim nuk diskutohet që Ministrinë e Administratës Publike mund ta drejtojë vetëm ministria e shtetit për Administratën Publike”, deklaroi Rama, i cili falënderoi gjithashtu përfaqësuesit e administratës për përkushtimin e tyre.
Njoftimi i kryeministrit përcakton hapin e ardhshëm formal në strukturën qeveritare: themelimin e një ministrie të veçantë për administratën publike, e cila sipas tij do të ketë përgjegjësi të zgjera për modernizimin institucional dhe për mbështetjen e rrugëtimit europian të Shqipërisë.
