Kryeministri Edi Rama mori pjesë në tryezën e Këshillit Kombëtar për të Drejtat dhe Mbrojtjen e Fëmijëve, ku u diskutuan ngjarjet e fundit dhe nevoja për një plan të përbashkët veprimi me Shoqërinë Civile dhe institucionet partnere ndërkombëtare. Në fjalën e tij, Rama u ndal te qasja e një pjese të shoqërisë ndaj dhunës në protestat e ditëve të fundit, duke theksuar se ajo është relativizuar, justifikuar dhe edhe himnizuar.
Ai kritikoi mënyrën si dhuna është paraqitur në publik, duke u shoqëruar, sipas tij, me keqinformim dhe keqedukim. Rama vuri në dukje se dhuna ka marrë një drejtim keqinformues dhe keqedukues, duke u kthyer në një stigmë për Policinë e Shtetit, ndërkohë që disa nga dhunuesit e institucioneve, shkollave dhe lirive themelore kanë përfituar status qytetarie dhe imunitet mediatik, si përçues të një përpjekjeje për të “përmbysur një sistem”.
Kryeministri paralajmëroi se nëse diskursi mbetet vetëm në ekspozim dhe kritikë, dhuna mund të institucionalizohet si një mjet i ri i adoptuar nga shoqëria, që më pas të përdoret individualisht. Ai shpjegoi se kjo prirje mund të kthehet në problem të përhapur, duke u përdorur edhe në ambientet arsimore e profesionale — për shembull nga nxënësit kundër pedagogut, kundër universitetit apo kundër pronarit të sipërmarrjes.
Rama shprehu shqetësim të veçantë për pjesëmarrjen domethënëse dhe thellësisht shqetësuese të shumë të miturve në ngjarje. Ai kërkoi që përpara se të konsiderohen fajtorë, këta të mitur të shihen si fëmijë që kanë nevojë për ndihmë, dhe ngriti pyetjen se si duhen neutralizuar burimet që i ushqejnë ata me frymën dhe nxitjen e dhunës. Në këtë kontekst ai theksoi nevojën për mobilizim dhe koordinim ndërmjet institucioneve dhe shoqërisë civile për të adresuar rrënjët e fenomenit dhe për të ndërtuar masa mbrojtëse dhe preventive ndaj ndikimeve që çojnë drejt dhunës.
