Kryeministri Edi Rama, në një intervistë ekskluzive për gazetaren Anna La Rosa të Italpress, trajtoi çështjet kryesore të politikës së brendshme dhe marrëdhënieve me Europën. Për rrugëtimin e Shqipërisë drejt BE-së ai e përshkroi procesin si të pakthyeshëm, duke rikujtuar se nga krizave mund të mësohet dhe se askush nuk mund ta ndalojë integrimin evropian të vendit.
Rama u ndal te marrëveshja Italo-Shqiptare për emigrantët, duke thënë se përpjekja ishte bërë me mirëbesim dhe se përtej zhurmës politike, ajo është një tentativë për të gjetur zgjidhje. Sipas tij, pranimi i saj nuk përbën një fitore por ilustron kohën e humbur në beteja publike që shpesh janë përplasje të kota. Ai theksoi se problemi kryesor është koha e humbur përpara arritjes së një qëndrimi të përbashkët.
Për protestat e ashtuquajtura “Revolucioni i Flamingove” kundër projektit turistik në Zvërnec, Rama hodhi poshtë akuzat dhe tha se ato po dëmtojnë imazhin e vendit. Ai deklaroi se prej vitesh është akuzuar për çdo gjë dhe se situata i shkakton dhimbje të thellë, pasi nuk është çështje vetëm personale por për Shqipërinë. Rama e përshkroi narrativën rreth çështjes si pa baza dhe nënvizoi se duhet të jenë ata që bëjnë akuzat që të sjellin prova, jo i akuzuari që të provojë pafajësinë e tij.
Kryeministri theksoi se deri tani nuk është paraqitur asnjë provë dhe se procesi është ende në zhvillim. Ai saktësoi se ende nuk është nënshkruar asnjë marrëveshje, pasi negociatat nuk kanë përfunduar, dhe për një tokë private shteti dhe qeveria nuk kanë lidhje; nuk ekziston leje ndërtimi dhe procedurat janë në vazhdim.
Rama tha se kupton arsyet e atyre që protestuan dhe se nëse do të dëgjonte të dyja palët do të qetësohej, por vuri në dukje se çështja ka dalë jashtë diskutimit lokal dhe është shndërruar në një simbol për këdo që dëshiron ta çojë në skenën ndërkombëtare. Ai përfundoi duke thënë se flamingot tani përdoren si simbol në nivele ndërkombëtare, deri aty sa çështja është bërë “një betejë kundër Donald Trumpit”.
