Po mbahet sot në kryeqytet dita e 27-të e protestës qytetare. Qytetarët nisën marshimin në bulevard për t’u bashkuar me pjesën tjetër para Kryeministrisë, ku përsëritën pesë kërkesat e tyre dhe me pankarta përkujtuan 82-vjetorin e gjenocidit ndaj shqiptarëve të Çamërisë. Pas disa orësh para Kryeministrisë ata vazhduan marshimin nëpër akset kryesore të qytetit.
Kërkesat e protestuesve janë të qarta dhe të ndara në pesë pika: 1) dorëheqja e panegociueshme e Kryeministrit dhe e qeverisë; 2) krijimi i një qeverie teknike tranzitore, jopartiake, me mandat 12-mujor; 3) ndryshime kushtetuese që sigurojnë barazi të plotë për të gjithë shtetasit shqiptarë para ligjit dhe miratimi i tyre me referendum popullor, përfshirë ndryshimin e Kodit Zgjedhor, ndryshimin e ligjit për financimin e partive politike dhe organizatave të ndryshme, si dhe kufizimin e ushtrimit të detyrës së Kryeministrit në jo më shumë se dy mandate, të plota ose të pjesshme, gjatë gjithë jetës politike të një individi; 4) në mënyrë paralele, anulimin e ndryshimeve të bëra në ligjin për “Zonat e Mbrojtura” dhe në ligjin për “Trashëgiminë kulturore”, shfuqizimin e paketës ligjore të njohur si “Paketa e Maleve” dhe shfuqizimin e statusit dhe të kuadrit ligjor për “Investimet Strategjike”; 5) përpilimin e një kontrate të re sociale mes qytetarëve dhe shtetit pas konsultimit me intelektualë, ekspertë teknikë dhe qytetarë apartiakë, të propozuar nga sheshi i protestës.
Një pjesë e protestuesve u grumbullua në sheshin “Skënderbej”, ndërsa disa të tjerë qëndronin të stacionuar para Kryeministrisë, ku do të mbahen fjalimet. Disa prej tyre kanë qëndruar deri në orët e para të mëngjesit pa u larguar nga zona e Kryeministrisë. Gjatë fjalës së tij në shesh, nismëtari Kola përmendi çështjen çame dhe brohoriti sloganet kundër politikanëve, përfshirë “Rama n’burg, Berisha n’burg.” Top Channel.
