Kryeministri Edi Rama mori pjesë në prezantimin e HHH (Health Hub Hospital), një spital ekselence europiane që vjen në Tiranë nga Grupi San Donato. Në fjalën e tij, Rama theksoi se Shqipëria po kalon një moment të rëndësishëm dhe se projekti përbën një “shtysë” të nevojshme për sistemin shëndetësor.
Duke iu drejtuar të pranishmëve në italisht, Rama tha: “Sa herë që kemi italianë mes nesh dhe në Tiranë, unë duhet të flas në italisht, sepse në pikë së pari dua që ata të ndihen si në shtëpinë e tyre dhe nuk i zë besë përkthyesit në gjuhën italiane.” Ai vuri në dukje përpjekjet e qeverisë për rindërtimin dhe përmirësimin e sistemit publik shëndetësor, duke shtuar se është bërë “goxha punë” për të hapur realitete me standarde të reja dhe për të nxitur mjekët e infermierët.
Rama sqaroi se synimi është të kalojë nga një sistem që ka qenë “dështim i madh” drejt një sistemi me legjitimitet të plotë, por se ende ka shumë punë për të bërë për të garantuar jo vetëm një bazë, por një garanci shëndetësimi për qytetarët. Për HHH, ai theksoi se spitali nuk do të jetë vetëm një institucion ekselence i jashtëm, por edhe një vend ku “ekselenca do të krijojë mundësi për të rinjtë shqiptarë që të rriten dhe t’i shërbejnë vendit të tyre në nivelet europiane.”
Rama shpjegoi se ndërtimi i një spitali ekselence italiane në Tiranë synon të ofrojë alternativa për ata që kërkojnë mundësi jashtë vendit, duke përmendur si destinacione Italinë dhe Turqinë. Ai tha se ky spital do të trajtojë edhe sëmundjet e komplikuara dhe falënderoi ekipin e grupit që ka punuar për projektin.
Sa i përket afateve, Rama deklaroi se është caktuar një datë me inxhinierin dhe se “gjithçka mund të jetë gati në fund të vjeshtës 2028.” Ai e përshkroi këtë si një parashikim italo-shqiptar, “pa shtysën arabe që mund t’i bëjë gjërat më shpejt.”
