Në një mbrëmje kulturore në Berlin, Kryeministri Edi Rama prezantoi 13 vizatime të tij në ambientet e Ambasadës së Italisë, në kuadër të një ngjarjeje të lidhur me ekspozitën personale “Chrysalizing”, që po zhvillohet në Société Gallery. Ekspozita përfshin gjithashtu skulptura të krijuara nga Rama, i cili prej vitesh njihet edhe për aktivitetin e tij artistik përtej angazhimit politik. Eventi u zhvillua në një format që ndërthur artin, kujtimet personale dhe politikën; ambasadori italian në Berlin, Fabrizio Bucci, i zhvilloi një bisedë jozyrtare me kryeministrin.
Në një intervistë për ANSA-n, Rama kujtoi të kaluarën e tij si sportist dhe artist, duke thënë me ironi: “Jam artisti më i mirë në botë mes kryeministrave dhe kryeministri më i mirë mes artistëve”. Gjatë bisedës ai u ndal edhe te çështjet politike dhe roli i Bashkimit Evropian për vendet që aspironë drejt anëtarësimit. Rama e përshkroi BE-në si një proces të domosdoshëm për ndërtimin e institucioneve në vendet aspirante dhe e cilësoi atë “një bekim”. Ai theksoi se procesi është i ndërlikuar, ndoshta “më neurotiku”, por funksionon.
Duke i komentuar ndryshimet pas pushtimit të Ukrainës nga Rusia, Rama tha se qasja e BE-së ka ndryshuar: përpara luftës kishte shumë fjalë por veprime të pakta, ndërsa pas saj u kuptua se vendet jashtë unionit mund të humben. Megjithatë, ai kritikoi ritmin e ngadaltë të procesit të integrimit evropian dhe kërkoi më shumë shpejtësi dhe më pak pengesa burokratike.
Rama kujtoi gjithashtu periudhën e tij si pedagog në Akademinë e Arteve në Tiranë dhe më pas si kryebashkiak i kryeqytetit, duke folur për transformimin urban dhe shoqëror të Shqipërisë. Sipas tij, vendi ka kaluar nga një shoqëri e fokusuar kryesisht te mbijetesa drejt një interesi më të madh për hapësirën publike dhe zhvillimin institucional.
Ngjarja u organizua në bashkëpunim me Société Gallery si pjesë e “Gallery Weekend Berlin”, ndërsa Ambasada e Italisë mbështeti pjesëmarrjen e një bande marshuese nga Olevano Romano, e lidhur me një vepër të artistes gjermane Annika Kahrs, e ekspozuar në Hamburger Bahnhof. (Top Channel)
