Marrja e një apartamenti me qira është bërë e papërballueshme jo vetëm në kryeqytet, por edhe në qytetet më kryesore, duke prekur jo vetëm të rinjtë por edhe familjet e reja me fëmijë në varësi. Qiraja në prill rezultoi 7.1% më e lartë se një vit më parë, sipas treguesve që konfirmohen edhe nga ndërmjetësuesit e pasurive të paluajtshme.
Arbër Brahaj, me eksperiencë në treg, shpjegon se si shkak kryesor po kthehen qiratë afatshkurtra: “Teksa janë shtuar ndjeshëm, qiratë ditore me çmimet shumë të larta kanë ndikuar në tregun e qirave në përgjithësi, Kjo lidhet dhe me ofertën në treg e cila është shumë e kufizuar dhe kërkesa vijon të qëndrojë e lartë sidomos në Tiranë”. Banka e Shqipërisë dhe Instituti i Statistikave raportojnë të njëjtën ecuri, duke vënë në dukje se çmimet e larta të qirave udhëheqën inflacionin në muajt e parë të vitit, me shtrenjtime që arrijnë nivelet më të larta të regjistruara kohët e fundit.
Brahaj thekson gjithashtu se kërkesa mbetet e lartë gjatë sezonit turistik dhe se zonat më të kërkuara janë ato afër qendrës së Tiranës, si dhe periferitë që shmangin trafikun, për shembull Astiri dhe Paskuqani: “Kërkesa vijon të qëndrojë e lartë sidomos në sezonet turistike. Ndërsa zonat më të kërkuara mbeten ato të cilat janë afër zonës së qendrës, si dhe zonat në dalje të Tiranës për të shmangur trafikun si Astiri, Paskuqani, etj”.
Për stabilizimin e çmimeve, Brahaj propozon ndërhyrje shtetërore dhe rritje të kontrolleve: “Kjo do të vinte vetëm nëpërmjet kufizime të vendosura nga qeveria, si dhe rritjes së kontrollove sidomos për qiratë ditore një pjesë e mirë operon në informalitet. Të cilat duhet të paguajnë një vlerë të lartë tatimi të papaguar deri më tani. Atëherë mund të flasim për një stabilizim”.
Një tjetër faktor që po rrit çmimet është zhvlerësimi i euros; disa prona nuk jepen më me qira në euro por në lekë, çka pasqyron vlera më të larta qiraje në monedhën vendase.
