Kryeministri Edi Rama reagoi përmes një videoje në Facebook ndaj debateve për koncertin e Kanye West dhe protestave që vazhdojnë prej më shumë se një muaji. Ai hodhi poshtë pretendimet se shteti kishte financuar koncertin me 50 milionë euro, duke i cilësuar si “shpifje”, dhe sqaroi se qeveria kishte ndërhyrë vetëm me një mbështetje prej 4 milionë eurosh për të shmangur anulimin e koncertit. Rama akuzoi kundërshtarët politikë për dezinformim dhe manipulim të opinionit publik.
Në reagim ai përmendi se, që në fillim, qeveria kishte firmosur vetëm një letër gatishmërie si mikpritës, ku ishte garantuar mikpritja, siguria dhe mbështetje logjistike, dhe se “nuk marrim përsipër asnjë angazhim financiar. Asnjë angazhim financiar!” Sipas tij, koncerti është një ngjarje botërore që do të financohet tërësisht nga sponsorat dhe shitja e biletave, ndërsa pretendimet “Ja ku janë 50 milionë eurot… vetëm për një natë koncert!” i quajti të sajuara për të njollosur opinionin.
Rama tha se u detyruan “in extremis” të ndërhynin me 4 milionë euro për të mos lejuar anulimin e një eventi të shumëpritur dhe për të shmangur turpërimin e Shqipërisë, veçanërisht para dhjetëra mijëra blerësve të huaj të biletave. Ai vlerësoi se ngjarja do t’i kthejë ekonomisë së kryeqytetit shumëfishin e kësaj shume, do të sjellë dhjetëra mijëra konsumatorë të huaj dhe do të promovojë globalisht emrin e Shqipërisë në komunitete të mëdha kulturore.
Kryeministri përdori një gjuhë të fortë kundër kritikuesve, i akuzoi si “shpifës” dhe iu referua librave të shenjtë që dënojnë shpifjen, duke theksuar se shpifja minon besimin mes njerëzve. Ai kundërshtoi pretendimet për dëme mjedisore lidhur me vendin e zgjedhur për arenën dhe pohoi se organizatorët identifikuan vendin si alternativë për mungesën e një stadiumi me kapacitet të madh.
Rama pranoi dhe respektoi arsyet për protesta individuale dhe sociale, por nënvizoi se problemi është kur protesta ushqehet me shpifje, dezinformim dhe manipulim, duke përfunduar se “problemi nuk janë flamingot. Problemi janë sorrat dhe korbat.”
