Paneli Zgjedhor për Ankesa dhe Parashtresa (PZAP) ka refuzuar ankesat e dy kandidatëve të Partisë Demokratike të Kosovës, Bekim Haxhiu dhe Qëndrim Kryeziu, të cilët kërkuan rinumërim të plotë të votave të kandidatëve të kësaj partie.
Haxhiu pretendoi në ankesën e tij se gjatë numërimit fillestar ishte dëmtuar deri në gjashtë vota dhe se diferenca me deputetin që ishte më lart në renditje ishte 102 vota, duke kërkuar rinumërim të plotë me arsyetimin se diferenca ishte e ngushtë dhe mund të vendoste për fituesin e ulëses. PZAP-ja e rrëzoi kërkesën e Haxhiut si të pabazuar, duke vlerësuar se gjatë rinumërimit “një numër kandidatësh minimalisht kanë fituar vota ndërsa kandidatë të tjerë po ashtu në mënyrë minimale kanë humbur disa vota”. Sipas panelit, këto janë korrigjime individuale dhe nuk tregojnë për një model sistematik të pasaktësive që do të justifikonte rinumërim të plotë.
Qëndrim Kryeziu kishte dorëzuar kërkesën për rinumërim të plotë me pretendimin se gjatë numërimit fillestar ishte dëmtuar me 589 vota dhe se gjatë rinumërimit atij i ishin shtuar ato vota. Megjithatë, PZAP-ja konstatoi se gjatë rinumërimit Kryeziu rezultonte me dy vota më pak dhe jo me 589 më shumë, dhe për këtë arsye hodhi poshtë ankesën e tij.
Pas këtyre vendimeve, dy kandidatët kanë afat 48 orë për të apeluar në Gjykatën Supreme. Nëse nuk e bëjnë këtë, Komisioni Qendror i Zgjedhjeve (KQZ) mund të shpallë rezultatet përfundimtare të zgjedhjeve të 7 qershorit. Valmir Elezi nga KQZ tha se, pas plotfuqishmërisë së vendimeve, do të shihet nëse ato përmbajnë obligime konkrete për KQZ-në për t’u zbatuar dhe më pas për të proceduar me aktin e shpalljes së rezultateve përfundimtare; ai shtoi se institucioni është në pritje të përfundimit të afatit ligjor të ankesave.
Rezultatet paraprake të zgjedhjeve tregojnë se Lëvizja Vetëvendosje doli fituese me 53 mandate, e pasuar nga Partia Demokratike e Kosovës me 22 mandate, Lidhja Demokratike e Kosovës me 18 dhe Aleanca me 7, ndërsa 20 ulëse janë të garantuara për pakicat.
