Një shtetas amerikan që punonte për një organizatë humanitare në Republikën Demokratike të Kongos rezultoi pozitiv me llojin Bundibugyo të virusit Ebola, njoftuan Qendrat Amerikane për Kontrollin dhe Parandalimin e Sëmundjeve (CDC). Autoritetet amerikane po bashkëpunojnë me organizatën punëdhënëse të pacientit, agjenci të tjera federale dhe partnerët në Republikën Demokratike të Kongos për të parandaluar përhapjen e virusit dhe për të identifikuar kontaktet me rrezik të lartë; deri tani nuk janë bërë publike detaje të tjera mbi identitetin apo gjendjen e pacientit.
CDC thekson se nuk janë konfirmuar raste të Ebolës në Shtetet e Bashkuara dhe se rreziku për publikun amerikan mbetet i ulët. Autoritetet shëndetësore thonë se shpërthimi është ende i kufizuar në zona të largëta të Republikës Demokratike të Kongos dhe Ugandës fqinje, ndërsa mundësia e përhapjes së virusit në SHBA konsiderohet shumë e ulët. Sipas të dhënave të publikuara nga autoritetet kongoleze, numri i rasteve të konfirmuara me Ebola ka arritur në 1.830, ndërsa 648 persona kanë humbur jetën nga sëmundja.
Në maj, një tjetër mjek misionar amerikan, Dr. Peter Stafford, rezultoi pozitiv me Ebola gjatë punës së tij në Republikën Demokratike të Kongos. Ai u evakuua me familjen në Berlin, ku iu nënshtrua trajtimit dhe më pas u shërua. Pas rikuperimit, Stafford tregoi se përjetoi temperaturë të lartë, dobësi të theksuar dhe vështirësi në ecje; bashkëshortja e tij, Dr. Rebekah Stafford, tha se familja kaloi momente të vështira dhe se fëmijëve iu desh t’u shpjegohej se nuk mund të afroheshin pranë babait gjatë trajtimit.
Muajin e kaluar u raportua gjithashtu rasti i parë i Ebolës jashtë Afrikës gjatë këtij shpërthimi, kur një punonjës humanitar rezultoi pozitiv në Francë pasi u kthye nga një mision në Republikën Demokratike të Kongos, duke ngritur shqetësime për monitorimin e udhëtarëve nga zonat e prekura. Autoritetet shëndetësore ndërkombëtare vijojnë të ndjekin situatën, ndërsa përpjekjet për frenimin e shpërthimit të virusit Bundibugyo në Afrikën Qendrore vazhdojnë.
