Mbrëmjen e sotme anketimet e kryera nga “Top Story” paraqitën shpjegimin kryesor të protestës qytetare që është në javën e saj të tretë. Sipas sondazhit, rreth 90% e të anketuarve mbështesin protestën në kryeqytet për tre arsye kryesore: mosbesimi ndaj institucioneve, mungesa e transparencës dhe kundërshtimi ndaj qeverisë. Pak më shumë se 10% e mbështetjes lidhen me çështje mjedisore dhe kundërshtim ndaj projektit specifik.
Analisti Arjan Curri vlerësoi se elementet simbolike, si flamingot, kanë qenë vetëm një justifikim dhe se revolta qytetare është në thelb kundër qeverisë dhe klasës politike. Curri theksoi se nëse 90% e të anketuarve e mbështesin protestën për shkak të mosbesimit ndaj institucioneve, mungesës së transparencës dhe kundërshtimit ndaj qeverisë, kjo tregon një qëndrim të qartë kundër shtetit dhe establishmentit politik, duke nënvizuar se protestat nuk janë më vetëm për flamingot.
Ervis Iljazaj shpjegoi se protesta është drejtuar kundër binomit politik Rama-Berisha, të cilët sipas tij kanë provokuar shumë shoqërinë shqiptare. Ai tha se dalja në shesh u vjen si frustrim dhe ndjesi përjashtimi nga të dyja partitë kryesore, ndërsa flamuri i flamingove ishte pika që çoi në përshkallëzim sipas anketimit. Iljazaj u shpreh se vendimet e marrë pa kundërshtim për dekada nga kjo klasë politike kanë sjellë një pritshmëri të tillë shpërthimi.
Ish-deputeti dhe ish-kryetar i LZHK, Dashamir Shehi, e përshkroi protestën si një nga më të mirat dhe më të freskat në vitet e fundit, por kërkoi që lëvizja të konkretizohet politikisht. Shehi theksoi dy elemente pozitive: identifikimin e kundërshtarit (dy liderët e partive) dhe natyrën horizontale të protestës, ku bashkohet mllefi ndaj establishmentit përtej ndryshimeve ideologjike. Ai theksoi nevojën që pjesëmarrësit të fillojnë të formulojnë kërkesa konkrete, përfshirë mundësinë e një qeverie tranzitore ose masa të tjera që ata i konsiderojnë të domosdoshme për lëvizjen.
