Kryeministri Edi Rama u bëri thirrje studentëve dhe qytetarëve që të distancohen nga dhuna, duke theksuar se protesta paqësore është një e drejtë e patjetërsueshme, ndërsa dhunën e cilësoi si krim dhe armik të demokracisë e lirisë. Ai nënvizoi se kjo kërkesë nuk synon të mohojë të drejtën e atyre që kundërshtojnë qeverinë, por, përkundrazi, thekson se rruga për të kërkuar të drejtat dhe për të luftuar demokratikisht është përballja paqësore e ideve dhe forcave.
Rama deklaroi se e drejta e paprekshme për protesta paqësore është pjesë e lojës demokratike, por theksoi se shumë nga studentët dhe qytetarët që gjejnë arsye të kundërshtojnë qeverinë dhe të tij nuk iu bashkuan asaj turme që, sipas tij, në kulmin e saj arriti në 1,500 vetë. Ai e përshkroi atë si një konglomerat ku brenda, përveç studentëve idealistë, kishte edhe individë të radikalizuar nga teoritë që i lidhen me ANTIFA-n, të cilët, sipas tij, kanë identifikuar dhunën dhe terrorin si mjet për të marrë peng Europën dhe vendet demokratike, si dhe rrugën e zhvillimit që Shqipëria ka zgjedhur.
Duke iu drejtuar studentëve, Rama u tha që të distancohen nga dhuna, duke përsëritur se “Idetë janë çështje zgjedhjeje, dhuna nuk është ide, është krim, armik i demokracisë dhe i lirisë.” Ai gjithashtu theksoi se ka ende kohë për të diskutuar dhe se do të vijojnë të ekspozojnë informacione të tjera: “Ka një orë për të folur për të gjitha. Sot ishte kjo, nesër do t’ju ekspozojmë gjëra të tjera për të ndarë me të gjithë një bindje të rrënjosur te informacioni dhe funksionimi i institucioneve.”
Rama përfundoi duke përsëritur bindjen se askush nuk do të mbetet pa u ekspozuar, duke paralajmëruar se do të ndajë më tej të dhëna dhe argumente për publikun lidhur me ngjarjet dhe partët e involvuara.
