Lëvizja “Shqipëria Bëhet” ka njoftuar një protestë masive për sot para Kryeministrisë, e cila pritet të zhvillohet në orën 12:00. Për të siguruar rendin dhe sigurinë publike, Policia e Tiranës ka bërë publike masat e nevojshme, duke u bazuar në ligjin “Për tubimet”.
Sipas njoftimit, autoritetet policore kanë hartuar një plan që përfshin kufizime të përkohshme të qarkullimit në disa akse kryesore të kryeqytetit për të siguruar mbarëvajtjen e protestës dhe për të shmangur probleme në lëvizjen e qytetarëve. Bllokimet e lëvizjes do të fillojnë nga ora 11:00 dhe do të zgjasin deri në përfundim të tubimit, sidomos në Bulevardin “Dëshmorët e Kombit”, nga Ura e Dajtit deri te kryqëzimi me rrugën “Ismail Qemali”.
Megjithatë, Policia ka paralajmëruar se në varësi të zhvillimeve, mund të ketë kufizime të tjera të qarkullimit edhe në akse të tjera rrugore. Qytetarët janë apeluar të shmangin udhëtimet me automjete në këto akse të bllokuara dhe t’i drejtohen rrugëve alternative për të lehtësuar qarkullimin dhe për të garantuar lëvizjen e lirë të pjesëmarrësve në protestë.
Këto masa janë pjesë e përpjekjeve për të menaxhuar situatën dhe për të siguruar që protesta të zhvillohet pa incidente.
