Qeveria ka nxjerrë për konsultim një projektligj që lidh taksën e pronës me vlerën reale të tregut, duke synuar ta zëvendësojë tarifimin sipas sipërfaqes që përdoret aktualisht. Ministria e Financave argumenton se sistemi ekzistues krijon padrejtësi, pasi prona me sipërfaqe të ngjashme paguajnë taksa thuajse të njëjta megjithëse vlera tregu mund të jetë shumë e ndryshme. Reforma synon që barra fiskale të reflektojë më mirë vlerën e pronës dhe aftësinë paguese të pronarit.
Sipas projektligjit, taksimi do të bëhet mbi vlerën e pronës në treg dhe tarifa do të rritet nga 0.05% aktuale në një interval 0.1%–0.2% të vlerës së pronës. Vendi ndahen në shtatë zona që do të përdoren për përcaktimin e tatimit dhe për zbritje të veçanta për banesën e parë. Projektligji parashikon që banesa e parë të përfitojë deri në 50% të vlerës së përjashtuar nga taksimi, brenda kufijve të përcaktuar për secilën bashki; kjo pritet të zbusë rritjen e taksës për shumicën e familjeve. Favorizimi nuk aplikohet për banesat e dyta, të treta apo për pronat e mbajtura si investim, duke shtuar barrën për personat me më shumë pasuri.
Përfaqësues të shoqatës NAREA vlerësuan se përqendrimi i taksimit mbi vlerën e tregut është i drejtë: “Është për tu përgëzuar ky përafrim me vlerën e tregut pasi nxjerrë më në pah dhe çmimet aktuale. Duke qenë se deri më sot përllogaritej sipas sipërfaqes së pronës. Bën një sistem më të drejtë”, tha Reinaldo Pipiria. Sidoqoftë, drejtues të shoqatës së pasurive të paluajtshme paralajmërojnë se projektligji ka përplasje me disa kapituj të BE-së, duke përfshirë lëvizjen e lirë të kapitalit, konkurrencën dhe ndihmën shtetërore, çështje tatimore dhe të drejta themelore.
Projektligji parashikon përjashtime për kategori në nevojë, përfshirë pensionistët dhe banesat sociale; ekspertët e tregut sugjerojnë shtimin e kategorive të tjera si nëna e ve, nënat me shumë fëmijë dhe familjet me fëmijë me aftësi ndryshe. Taksa mbi pasurinë e paluajtshme do të mblidhet sipas këtij ligji nga viti 2029 për njësitë e ndërtesave dhe nga viti 2031 për parcelat.
