Prokuroria Themelore në Gjakovë ka dhënë detaje për ngjarjen e 23 gushtit në Kërvasari të Malishevës, ku një 25-vjeçare shtatzënë humbi jetën pas plagosjes me armë zjarri. Sipas njoftimit zyrtar, bashkëshorti i saj është personi i dyshuar për ngjarjen dhe ndodhet gjithashtu në gjendje kritike për jetën.
Policia e Kosovës u njoftua mbrëmjen e 23 gushtit për të shtëna me armë zjarri. Efektivët, teksa mbërritën në banesë, gjetën çiftin e plagosur në një dhomë gjumi. Të dy u transportuan në Qendrën Klinike Universitare të Kosovës (QKUK), ku gjendja e të resë ishte kritike dhe nuk mundi t’u mbijetojë plagëve. Viktima, 25 vjeçe, ishte në javën e 34-të të shtatzënisë. Pavarësisht përpjekjeve të ekipit mjekësor dhe masave reanimatore, ajo ndërroi jetë në QKUK.
Trupi i viktimës, me urdhër të Prokurorit të Shtetit, është dërguar në Institutin e Mjekësisë Ligjore në Prishtinë për autopsi. Prokuroria bën me dije se edhe i dyshuari ka marrë plagë të rënda dhe po trajtohet në spital; gjendja e tij raportohet e rëndë dhe kritike për jetën.
Rasti është iniciuar për dy vepra penale: “Vrasja e rëndë” dhe “Mbajtja në pronësi, kontroll ose posedim të paautorizuar të armëve”. Në vendngjarje është gjetur dhe sekuestruar një armë zjarri, e cila dyshohet se lidhet me ngjarjen. Prokurori i Shtetit ka dalë në vendngjarje, ndërsa hetuesit, në koordinim me Policinë e Kosovës, po mbledhin prova dhe po kryejnë veprimet hetimore për të zbardhur plotësisht dinamikën dhe rrethanat e ngjarjes.
Prokuroria konfirmon se për momentin konsideron bashkëshortin si të dyshuar, por njofton se rrethanat dhe motivi i të shtënave mbeten objekt hetimi dhe nuk janë bërë të ditura në detaje publikisht.
