Prokuroria Speciale e Kosovës ka ngritur aktakuzë ndaj Fatmir Shehollit për spiunazh dhe shantazh. Sheholli, i arrestuar në tetor të vitit të kaluar, akuzohet se, nga një datë e pacaktuar deri në arrestimin e tij, “me dashje direkte, në cilësinë e personit të rekrutuar nga Shërbimi Informativ i Serbisë (BIA), e ka ndihmuar veprimtarinë e këtij shërbimi”. Në dosje përfshihen si prova edhe veprimtaria e tij gjatë luftës në Kosovë dhe deklarimet e publikuara në media ndërkombëtare në vitin 1999, përfshirë një intervistë në Los Angeles Times, të cilat sipas prokurorisë qëndrojnë në harmoni me narrativën zyrtare serbe ndaj Kosovës.
Prokuroria përmend gjithashtu qëndrimet publike të Shehollit në favor të Listës Srpska dhe mbrojtjen publike të Milan Radoiçiçit, për të cilin Sheholli kishte shprehur besim në pafajësinë e tij lidhur me hetimet për vrasjen e Oliver Ivanoviçit. Me urdhër të gjykatës janë përdorur masa të veçanta hetimore, përfshirë përgjimin dhe vëzhgimin, për të provuar përfshirjen e tij në spiunazh.
Sipas aktakuzës, përgjimet dhe monitorimi konstatojnë kontakte të vazhdueshme midis Shehollit dhe Bojan Dimiç, zyrtar i lartë i BIA-së, në zbatim të planit për pranimin, transportimin dhe publikimin e materialeve të siguruara nga ky shërbim, me qëllim ndikimin në opinionin publik dhe jetën politike në Kosovë. Prokuroria citon komunikime që lidhen edhe me pjesëtarë të Ushtrisë Çlirimtare të Kosovës dhe jep shembull mesazhi i përkthyer që njofton për diçka të “imët por të pa rëndësishme” lidhur me babain e një ish-pjesëtari të UÇK-së.
Në aktakuzë përmenden biseda të shumta të regjistruara midis Shehollit dhe Dimiçit, si dhe midis Shehollit dhe gazetarit Milaim Zeka, ku diskutohet dërgimi dhe përkthimi i materialeve, burimi i paraqitur si “GIZI Gjerman” dhe pagesa prej 2,000 eurosh (1,000 muajt paraprak dhe 1,000 pas dhjetë ditësh) për publikimin në emisionin “Pa Rrotlla”. Sipas dosjes, Sheholli ka marrë materialet më 26 shtator 2025 pranë Shkollës Teknike në Mitrovicën e Veriut; personi që i dorëzoi ia dha një fasikël të kaltër dhe një shumë prej 5,000 euro, dhe më pas Sheholli udhëzoi bashkëshorten të fshehë materialet në trupin e saj. Prokuroria pretendon se veprimet synonin diskreditimin e zyrtarëve dhe oponentëve të Listës Srpska për të ndikuar rezultatet e zgjedhjeve të 12 tetorit 2025.
