Komisioni Europian, sipas mediave greke, ka vendosur të lehtësojë zbatimin e Sistemit të Ri të Hyrje/Daljeve (EES) për të shmangur radhët e gjata dhe presionet në kufijtë evropianë. Sipas burimeve, KE-ja do t’u lejojë shteteve anëtare të aplikojnë fleksibilitet në zbatimin e sistemit, pas problemeve të mëdha të regjistruara në aeroporte që kanë sjellë vonesa dhe fluturime të humbura. Zyrtarët e Komisionit theksuan se nuk bëhet fjalë për pezullim të sistemit, por për një “fleksibilitet të integruar” që u jep mundësi autoriteteve kufitare të ndalojnë përkohësisht disa procedura, si regjistrimi biometrik, gjatë periudhave me trafik të lartë.
Të dhënat e Komisionit tregojnë se koha mesatare e përpunimit për udhëtar është rreth 70 sekonda, dhe që nga tetori sistemi ka regjistruar rreth 61 milion hyrje dhe dalje. Megjithatë, disa vende anëtare po përballen ende me vështirësi operacionale. Linjat ajrore dhe disa qeveri — përfshirë Greqinë, Francën, Belgjikën dhe Italinë — kanë kërkuar pezullim të plotë të EES deri në shtator, duke shprehur shqetësime lidhur me vonesat gjatë sezonit të lartë të udhëtimeve. Për destinacionet turistike, veçanërisht Greqinë, sistemi prezanton rreziqe konkretë për bllokime në kufij gjatë fluksit të turistëve.
Disa kompani ajrore pohojnë se pasagjerët po paguajnë çmimin e situatës së rënduar dhe kërkojnë që vendet e zonës Shengen ta pezullojnë sistemin për disa muaj. Vendimi i Komisionit për fleksibilitet synon të lehtësojë presionin në pikat kufitare duke lejuar masa të përkohshme administrative, por pa ndalimin e përhershëm të EES. Kjo qasje synon të balancojë nevojën për siguri dhe kontroll kufitar me kërkesën për efikasitet dhe shmangie të vonesave që ndikojnë në udhëtarët dhe operimin e linjave ajrore.
