Shqipëria ka bërë, sipas kryenegociatores Majlinda Dhuka, progres të rëndësishëm në procesin e integrimit në BE, ndërsa ajo raportoi në Komisionin për Evropën dhe Punët e Jashtme bilancin për vitin 2025 dhe katërmujorin e parë të 2026. Dhuka njoftoi se Bashkimi Europian i ka parashtruar Shqipërisë 101 kushte për mbylljen e negociatave dhe se janë hartuar 31 draftplane pune që zbërthejnë planet e veprimit për rreth 600 nisma evropiane, në disa raste nisma ose ndryshime ligjore. Ajo cilësoi fushën e mbrotjes së mjesidist dhe të sigurisë ushqimore si kapitujt më sfidues, që kërkojnë bashkëpunim afatgjatë.
Kryenegociatorja theksoi punën sistematike për forcimin e sistemit të drejtësisë dhe deklaroi se Shqipëria po pret përfundimin e diskutimeve të vendeve anëtare mbi kapitujt e drejtësisë dhe sigurisë, një përfundim që, sipas saj, do t’i jepte vendit “dritën jeshile” për të hyrë formalisht në fazën e mbylljes së negociatave. Dhuka vlerësoi gjithashtu aktivitetin e SPAK dhe të Gjykatës së Posacme gjatë vitit 2025 në luftën kundër korrupsionit.
Pas përfundimit të raportimit filluan kritikat e anëtarëve opozitarë. Zv.kryetarja e komisionit, Albana Vokshi, e cilësoi raportin sipërfaqësor dhe kërkoi llogari për mënyrën si menaxhohet procesi i integrimit, duke pyetur pse mbahet i “sekret” dhe pse nuk bëhen publike kushtet. Ajo akuzoi qeverinë për ndryshime në idenë e anëtarësimit dhe për modele të reja integrimi që, sipas saj, nuk garantonin të drejta të plota për Shqipërinë; në fjalimin e saj përmendi edhe raste ku kryeministri, siç tha, ka mbrojtur publikisht persona që përballen me akuza nga SPAK, duke përmendur emra konkretë.
Ndaj kritikes së opozitës reagoi Taulant Balla, i cili tha se lista e projektligjeve është e aksesueshme dhe e publikuar në faqen zyrtare të Kuvendit dhe se çdo deputet e ka atë në dorë. Demokrati Eno Bozdo komentoi gjithashtu negativisht raportin, duke e përshkruar atë si një përmbledhje të reformave që ekzistojnë vetëm në letër. Përmbajtja e raportimit dhe debatet u zhvilluan në Komisionin për Evropën dhe Punët e Jashtme.
