Presidenti i Salvadorit, Nayib Bukele, njoftoi se do të ndalojë “gjuhën gjithëpërfshirëse” në shkollat publike, si pjesë e rregullave të reja disiplinore për institucionet arsimore. Në një mesazh në X, Bukele tha: “Që nga sot, gjuha e quajtur gabimisht ‘gjithëpërfshirëse’ është e ndaluar në të gjitha institucionet publike të arsimit në vendin tonë”.
Ky vendim ka si qëllim promovimin e “përdorimit të mirë” të gjuhës dhe shmangien e përzierjes së ideologjive ose globalizimit që mund të dëmtojë zhvillimin e nxënësve, sipas ministrës së Arsimit, Carla Triggeros. Ndalimi i gjuhës gjithëpërfshirëse do të zbatohet edhe në shërbimet e Ministrisë së Arsimit, përfshirë libra dhe materialet mësimore.
Rregullat e reja vijnë në një kontekst ku nxënësit e shkollave publike tashmë janë të detyruar të ndjekin rregulla të ashpra për veshjen dhe modelin e flokëve, të cilat sindikata e mësuesve, Frente Magisterial Salvadoreño, i ka cilësuar si një “militarizim” të sistemit shkollor. Vitin e kaluar, Bukele kishte larguar 300 punonjës nga Ministria e Kulturës për promovimin e ideve që nuk përputheshin me vizionin e tij për “familjen tradicionale”, “besimin” dhe “jetën”, sipas ligjvënësve të partisë në pushtet.
Bukele, i cili ka qeverisur që nga viti 2019, është shumë i njohur për luftën e tij kundër bandave. Megjithatë, organizatat për të drejtat e njeriut kanë ngritur shqetësime për shkeljet e të drejtave të njeriut, duke theksuar se mijëra njerëz të pafajshëm janë në burg.
Kjo politikë shpreh qartë angazhimin e qeverisë për një qasje strikte në arsimin publik dhe përpjekjet për të mbrojtur një ideologji konservatore në vend.
