Presidenti Bajram Begaj priti sot në një takim Gjeneralmajor Özkan Ulutaş, Komandantin e KFOR-it, misionin e NATO-s në Kosovë. Gjatë bisedës, Presidenti Begaj vlerësoi rolin e Turqisë, e cila merr drejtimin e këtij misioni për herë të dytë, duke shprehur mirënjohje për angazhimin e saj me trupa në Kosovë.
Begaj theksoi rëndësinë e KFOR-it si një faktor kyç për paqen dhe stabilitetin, jo vetëm në Kosovë, por gjithashtu në tërë rajonin. Ai riafirmoi nevojën për thellimin e bashkëpunimit ndërmjet vendeve të rajonit, si një mjet i rëndësishëm për sigurimin e paqes dhe stabilitetit.
Gjithashtu, Presidenti inkurajoi bashkëpunimin ndërmjet KFOR-it dhe institucioneve të Kosovës, duke i dhënë prioritet Forcës së Sigurisë së Kosovës. Ai theksoi rëndësinë e zhvillimit dhe modernizimit të saj në përputhje me standardet e NATO-s. Gjatë takimit, u vlerësua angazhimi i KFOR-it për garantimin e një situate të qetë sigurie dhe liri lëvizjeje, veçanërisht në Veri të Kosovës.
Në përfundim, Presidenti Begaj konfirmoi angazhimin dhe mbështetjen e Shqipërisë ndaj misionit KFOR, duke u shprehur se ky mision është esencial për arritjen e një sigurie të qëndrueshme në rajon.
