Manchester United po planifikon një revolucion të rëndësishëm në skuadër këtë verë, duke synuar të arkëtojë mbi 100 milionë paundë nga shitja e disa futbollistëve të cilët nuk bëjnë pjesë në planet e klubit. Sipas raportimeve nga tabloidi britanik ‘The Sun’, Jim Ratcliffe po orienton strategjinë e klubit drejt një “supermarketi futbolli”.
Në listën e futbollistëve që pritet të shiten janë, ndër të tjerë, Manuel Ugarte, Joshua Zirkzee, Andre Onana, Rasmus Hojlund dhe Marcus Rashford. Ndërsa Casemiro, Jadon Sancho dhe Tyrell Malacia do të largohen nga Old Trafford pa marrë asnjë shumë për transferim.
Manchester United pret të arkëtojë rreth 64 milionë paund nga shitja e Rashford dhe Hojlund, të cilët janë huazuar përkatësisht te Barcelona dhe Napoli. Në rastin e Andre Onana, klubi do të kërkojë të paktën 19 milionë paund për të përmbushur kërkesat financiare të Premier League.
Megjithatë, shitjet e Ugarte dhe Zirkzee priten të sjellin një humbje financiare prej 50.8 milionë dhe 36.5 milionë paundësh. Pavarësisht kësaj, kursimi prej 350 mijë paundësh në javë nga paga e Casemiros pritet të ndihmojë financiarisht klubin.
Një nga motivet e këtij reshjoni është interesi për Elliot Anderson, mesfushor i Nottingham Forest, i cili vlerësohet 100 milionë paundë. Manchester City gjithashtu po e ndjek këtë lojtar, duke e konsideruar si zëvendësuesin ideal për Bernardo Silvën, i cili pritet të largohet nga Citizens në fund të sezonit.
Këto lëvizje tregojnë se Manchester United është në një periudhë transformimi dhe po përpiqet të rifreskojë skuadrën e tij për të arritur suksesin në të ardhmen. Me një strategji të tillë, klubi ka si qëllim jo vetëm të reduktojë shpenzimet, por gjithashtu të forcojë radhët e tij me lojtarë potencialisht të talentuar.
