Presidenti i Republikës, Bajram Begaj, mori pjesë në kremtimin e 70-vjetorit të shugurimit meshtarak të Kardinal Ernest Simoni në katedralen “Santa Maria del Fiore” në Firence. Gjatë ceremonisë, Begaj vlerësoi figurën e Kardinal Simoni si simbol të qëndresës, besimit dhe sakrificës, duke e quajtur atë “martir i gjallë”.
Në mesazhin për 70-vjetorin e shugurimit, Presidenti theksoi se historia e Kardinal Simoni është “dëshmi e gjallë se asnjë regjim nuk mund të shfarosë besimin dhe dinjitetin njerëzor” dhe shtoi se besimi matet në “kohë sprove”. Begaj nderoi edhe sakrificën e klerikëve gjatë diktaturës dhe përmendi 38 martirët katolikë të lumturuar.
Presidenti vuri theksin tek kontribuimi i këtyre sakrificave për formimin e një modeli bashkëjetese fetare në Shqipëri, duke e konsideruar atë “një nga vlerat më të çmuara dhe më të bukura” që duhet të ruhet dhe përcillet te brezat e ardhshëm. Ai nënvizoi se kjo liri e bashkëjetesës nuk erdhi vetë, por ka emra, histori dhe sakrifica, dhe përmendi emrin e Kardinal Ernest Simonit si një nga këta emra.
Begaj dërgoi një mesazh të veçantë nderimi për Papa Françeskun, i cili ngriti në dinjitet Kardinalin Simoni dhe e prezantoi botës si një shembull që kapërceu vuajtjet e diktaturës “pa urrejtje, pa hakmarrje dhe me përulësi”. Presidenti vlerësoi vendimin e ngritjes në kardinal si “akt i thellë mirënjohjeje dhe vlerësimi” për një histori që dëshmon qëndresë, shpresë, besim dhe dinjitet njerëzor.
Në fjalën e tij Begaj kujtoi se madhështia nuk qëndron tek fuqia apo fama, por te përulësia, dhe citoi një zakon shqiptar: njeriu bëhet i madh jo kur merr, por kur jep; jo kur sundon, por kur shërben; jo kur flet shumë, por kur vepron drejt. Ai falënderoi autoritetet fetare dhe drejtuesit e Firences për praninë në meshë dhe mbylli mesazhin me urimin: “Le të jetë kjo ditë jo vetëm një nderim për të kaluarën, por edhe një angazhim për të ardhmen, për të ruajtur vlerat, për të mbrojtur dhe për të ndërtuar një shoqëri më njerëzore, më të drejtë, më të paqtë dhe më të lirë në mendim, besim e veprim”. Presidenti shoqërohej në ceremoni nga Ambasadorja e Shqipërisë në Vatikan, Majlinda Frangaj.
