Më 10 tetor 2025, në Abu Dhabi, Policia e Emirateve të Bashkuara Arabe, me mbështetjen e Shërbimit të Bashkëpunimit Ndërkombëtar të Policisë (SCIP), arrestoi shtetasin shqiptar Altin Sinomati, i cili ishte në kërkim ndërkombëtar me urdhër të Drejtorisë Rajonale Antimafia të Romës.
Sinomati dyshohet se është porositësi i vrasjes së Selavdi Shehajt, i njohur si “Passerotto”, ngjarje e ndodhur më 20 shtator 2020 në plazhin e mbushur me pushues në Torvajanica, Pomezia.
Sipas hetimeve të përbashkëta të Karabinierëve të Romës, Policisë së Shtetit dhe SCO, Sinomati akuzohet se i ka dhënë 150 mijë euro si shpërblim Raul Esteban Calderonit, ekzekutorit të vrasjes.
Për këtë krim, Calderon dhe Giuseppe Molisso janë dënuar në shkallë të parë me burgim të përjetshëm nga Gjykata e Asizes së Frosinones.
Në një tjetër procedim penal, Sinomati është i akuzuar si një nga kanalet kryesore të furnizimit me kokainë të organizatës kriminale të drejtuar nga Molisso Giuseppe dhe Bennato Leandro, e cila u godit më 18 mars 2025 nga Komanda Provinciale e Karabinierëve të Romës.
Gjatë asaj operacioni, pas arrestimit të Calderonit, Sinomati iu shmang kapjes dhe u largua drejt Emirateve të Bashkuara Arabe, ku u fsheh deri në arrestimin e tij ditët e fundit.
Kujtojmë se gazetari investigativ italian Sidfrido Rannucci e kishte përmendur emrin e Selavdi Shehajt kur foli për sulmin me eksploziv ndaj tij.
Duke folur për kërcënimet që i kishin ardhur atij nga një grup kriminal, gazetari italian tha: ““Kujtoj se një tjetër trafikant i atij grupi, Selavdi Shehaj, u vra pak hapa larg shtëpisë sime, në plazhin e Torvaianicës”.
