Në Lezhë është zbardhur dinamika e ngjarjes së 26 prillit 2026 në fshatin Balldren, ku bashkëshortët Kreshnik dhe Gentiana Mujeci u vranë me armë zjarri. Drejtori i Drejtorisë Vendore të Policisë Lezhë, Arben Nasufi, bëri të ditur në një konferencë për mediat se rreth orës 14:50 në rrugën “Balldren-Torovicë” u qëllua me armë zjarri në drejtim të automjetit që drejtohej nga Kreshnik Mujeci. Pas njoftimit, në vendngjarje mbërritën menjëherë shërbimet e policisë dhe të urgjencës.
Për zbardhjen e ngjarjes u ngrit një grup hetimor i posaçëm, me specialistë të Hetimit të Krimeve të Rënda të DVP Lezhë, Departamentit të Policisë Kriminale dhe ekspertë kriminalistë, që nën drejtimin e Prokurorisë kryen veprime intensive hetimore dhe metoda proaktive. Hetimet përfshinë këqyrjen dhe administrimin e të gjitha pamjeve filmike mbi itinerarin e lëvizjeve të viktimave dhe autorëve, si dhe analizimin e çdo prove materiale; si rezultat u identifikua njëri prej automjeteve të përdorura, një “Audi A4”.
Sipas policisë, nga dinamika e ngjarjes Audi A4 kishte survejuar lëvizjen e Kreshnik Mujeci, ndërsa më pas një automjet tjetër, tip “Volksëagen” pa targa, dyshohet se i prerë rrugën automjetit të viktimave. Shtetasit që ishin në automjet dyshohet se qëlluan me breshëri armësh në drejtim të automjetit të Mujecit, duke shkaktuar vdekjen e tij dhe të bashkëshortes. Hetimet e mëtejshme çuan në identifikimin e tre personave të dyshuar: A. M., 22 vjeç; F. M., 36 vjeç; dhe R. M., 23 vjeç, banues në Lezhë.
Policia sjell në dijeni se nga kontrollet në disa banesa dhe ambiente të tjera nuk u arrit të kapeshin të dyshuarit, të cilët janë shpallur në kërkim. Operacioni për kapjen e tyre vazhdon intensivisht me përfshirjen e forcave speciale “RENEA”, Forcave Kombëtare të Sigurisë dhe strukturave operacionale të DVP Lezhë. Po vijon puna për gjetjen dhe sekuestrimin e automjeteve dhe armëve të përdorura. Drejtoria Vendore e Policisë Lezhë shpreh angazhimin maksimal për garantimin e rendit dhe sigurisë dhe fton qytetarët të denoncojnë çdo rast të paligjshmërisë.
