Një përleshje me përmasa të mëdha mes të miturve u parandaluar në Yzberisht të Tiranës pas ndërhyrjes së Komisariatit të Policisë Nr. 6. Pas marrjes së informacionit se dhjetëra të mitur do të konfliktroheshin në rrugën “Besim Alla”, shërbimet policore shkuan menjëherë në zonë dhe konstatuan disa prej tyre të pajisur me shkopinj bejsbolli. Dy shkopinj bejsbolli u sekuestruan.
Si rezultat i veprimeve, 23 të rinj, të moshave 13 deri në 17 vjeç, u shoqëruan në ambientet e komisariatit dhe u proceduan penalisht. Gjatë hetimeve dhe veprimeve procedurale, të kryera në prani të prindërve dhe psikologut, materialet u referuan në Prokurori, ku ka nisur procedimi në gjendje të lirë për 23 të mitur. Gjithashtu u sekuestruan sendet e forta që do të përdoren gjatë konfliktit.
Policia bën me dije se identifikoi dhe shoqëroi jo vetëm ata që ishin në vendngjarje, por edhe të miturit e tjerë që do të përfshiheshin në ngjarje. Sipas njoftimit, ndërhyrja e menjëhershme e Komisariatit Nr. 6 parandaloi konfliktin ndërmjet dhjetëra të miturve në Yzberisht.
Në komunikatën e Policisë theksohet se institucioni mbetet maksimalisht i angazhuar për të parandaluar konflikte ndërmjet të miturve dhe të rinjve, të cilat, ndonëse nisin për motive të dobëta, mund të përshkallëzohen në ngjarje të rënda kriminale. Për të arritur këtë objektiv, Policia kërkon bashkëpunimin intensiv të prindërve, të afërmve, miqve dhe mësuesve të të miturve, si dhe vëmendjen ndaj indicieve të shfaqura në përditshmëri dhe në hapësirën dixhitale për ngjarje të tilla ndërmjet bashkëmoshatarëve. Njoftimi përcjell gjithashtu se siguria e fëmijëve dhe të rinjve është prioritet absolut i Policisë së Shtetit.
Lajmi është publikuar nga Top Channel.
