Protesta të dhunshme kanë shpërthyer në disa qytete të Iranit, pas vdekjes së një 22-vjeçareje. Vajza kurde, Mahsa Amini ndërroi jetë në spital në datën 16 shtator, pasi u arrestua dhe dhunua nga policia morale për shkak se nuk kishte vendosur mbulesën e quajtur si hixhab.
Protestues të shumtë u mblodhën fillimisht në spitalin ku po kurohej 22-vjeçarja, në Teheran dhe u përplasën me forcat e sigurisë që përdorën gaz lotsjellës sprej piperi kundër tyre.
Trupi i Amini u transportua më pas në provincën e saj të lindjes, Kurdistan për varrimin që u bë mëngjesin e 17 shtatorit.
“Institucionet e sigurisë e detyruan familjen Amini të zhvillojë funeralin pa ndonjë ceremoni për të parandaluar tensionet,” tha Soma Rostami nga Hengaë, një organizatë kurde për të drejtat e njeriut.
Pavarësisht paralajmërimeve, qindra njerëz thuhet se u mblodhën në qytetin e lindjes së Aminit, Saqqez, për të marrë pjesë në varrim. Disa prej të pranishmëve thërrisnin slogane anti-qeveritare si “vdekje diktatorit”.
Organizatat kurde të shoqërisë civile kanë bërë thirrje për një grevë të përgjithshme në të gjithë Kurdistanin.
Videot e protestuesve në Saqqez duke grisur postera të liderit autoritar të Iranit, Ayatollah Khamenei, janë përhapur në mediat sociale.
Amini ishte duke vizituar Teheranin me familjen e saj më 13 shtator, kur ajo u arrestua nga policia e moralit për shkelje të ligjit të rreptë të hixhabit. Familjes së saj iu tha se ajo do të lirohej nga komisariati pas një “seance riedukimi”.
Dëshmitarët raportuan se Amini ishte rrahur në furgonin e paraburgimit, një pretendim që policia e mohon.
Policia thotë se Amini ka pësuar një atak në zemër, version që nuk pranohet nga familja e Aminit.
