Policia ka zbardhur detajet e operacionit të koduar “Grupi”, për goditjen e aktivitetit kriminal në fushën e trafikimit dhe shpërndarjes së lëndëve narkotike në qarkun Elbasan. Operacioni u zhvillua nga Sektori për Hetimin e Narkotikëve dhe Trafiqeve të Paligjshme në DVP Elbasan, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan, me mbështetjen e Forcës Kombëtare të Sigurisë, Njësia Fier. Hetimi ishte ndjekur me metoda speciale për disa muaj dhe kishte fokus qytetet Elbasan, Librazhd dhe Prrenjas.
Nga Prokuroria Elbasan janë lëshuar gjithsej 24 urdhra ndalimi. Janë ekzekutuar 16 urdhra ndalimi; 8 urdhra janë ekzekutuar gjatë operacionit të sotëm dhe 8 gjatë periudhës hetimore njëvjeçare. Vijon puna për lokalizimin dhe kapjen edhe të 8 shtetasve të tjerë, të cilët gjatë operacionit nuk u gjetën në banesa. Gjatë operacionit të ditës u kap edhe 1 shtetas i shpallur në kërkim dhe u arrestua në flagrancë një shtetas tjetër për veprimtari kriminale në fushën e narkotikëve.
Gjatë bastisjeve u sekuestruan 9 kg lëndë e dyshuar narkotike kanabis, një pjesë e ndarë në doza gati për shitje, rreth 100 gram kokainë, një pjesë gati për shitje, 5 peshore elektronike, 7 automjete dhe 17 aparate celularë. Gjithashtu u ekzekutuan 27 vendime të Gjykatës për kontrolle banesash dhe ambientesh të ndryshme.
Gjatë operacionit të mëngjesit u ekzekutuan 8 urdhra ndalimi për shtetasit: I. Sh., 38 vjeç; R. Z., 52 vjeç; G. Ç., 23 vjeç; A. B., 49 vjeç; N. S., 39 vjeç; L. F., 33 vjeç; J. I., 31 vjeç dhe M. Ç., 32 vjeç. U arrestua në flagrancë shtetasi R. H., 39 vjeç, si dhe u kap shtetasi në kërkim P. Q., 54 vjeç, i shpallur në kërkim nga Gjykata e Shkallës së Parë e Juridiksionit të Përgjithshëm Durrës për veprën penale “Menaxhimi i mbetjeve”, kryer në bashkëpunim.
Strukturat e Hetimit të DVP Elbasan, nën drejtimin e Prokurorisë Elbasan, vijojnë punën për dokumentimin e plotë ligjor të kësaj veprimtarie kriminale dhe për kapjen e shtetasve të shpallur në kërkim.
