Emri i Andrea Pirlos është lidhur me polemika pas emërimit të tij si “global brand ambassador” i kompanisë ruse të basteve Fonbet, marrëveshje e bërë publike më 9 tetor 2025. Partneriteti tërhoqi vëmendje për shkak të lidhjeve të Fonbet me tregun rus dhe marrëdhënieve të Pirlos me ish-futbollistin ukrainas Andriy Shevchenko. Imazhi i Pirlos vazhdon të shfaqet në faqet promovuese të Fonbet, duke e vendosur atë përballë një situate të ndjeshme për menaxhimin e kontratës dhe reagimeve që kanë shoqëruar partneritetin.
Fonbet lidhet me biznesmenin rus Sergey Lomakin, i vlerësuar në rreth 1.2 miliardë dollarë në të dhënat e vitit 2025. Lomakin ka ndërtuar pjesën më të madhe të pasurisë përmes rrjetit të dyqaneve me ulje “Fixprice”, që operon në Rusi dhe Europën Lindore. Ai është i përfshirë po ashtu në futboll: zotëron klubin e Emirateve të Bashkuara Arabe United FC, ku Pirlo është trajner që nga viti 2025, si dhe klubin Rodina Moskë. Në portofolin e tij përfshihet edhe Pafos i Qipros, skuadër që ka marrë pjesë në gara europiane, ndërsa për disa vite ka qenë pronar edhe i klubit letonez Riga FC. Për më tepër, Lomakin ka shfaqur interes për klube të tjera evropiane, përfshirë Udinesen dhe Saint-Etienne, por këto marrëveshje nuk u finalizuan.
Fonbet është themeluar në vitin 1994 dhe nisi shërbimet e basteve online në 2002. Aktualisht kompania ka rreth 4 mijë punonjës dhe dhjetëra pika fizike bastesh në Moskë. Ajo është partner zyrtar i Federatës Ruse të Futbollit dhe i Kontinental Hockey League, dhe ka qenë sponsore kryesore e Match TV, platformës televizive sportive të lidhur me grupin Gazprom. Për shkak të kufizimeve dhe sanksioneve ndërkombëtare ndaj Rusisë, zgjerimi i Fonbet jashtë tregut vendas është vështirësuar, çka ka shtyrë kompaninë të investojë më shumë në marketing dhe bashkëpunime me figura të njohura të futbollit ndërkombëtar.
Mes emrave që kanë promovuar kompaninë janë edhe ish-futbollistët italianë Andrea dhe Marco Materazzi, të cilët morën pjesë në një aktivitet sportiv në stadiumin “Luzhniki” në Moskë dhe deklaruan se ishin aty “vetëm për sportin dhe për fëmijët”.
