Presidenti i SHBA-së, Donald Trump, do të ndjekë të dielën një event të arteve marciale të përziera (MMA) në Shtëpinë e Bardhë, ku në South Lawn është ngritur një arenë e përkohshme e quajtur “The Claw” për të pritur 14 luftëtarë elitarë të UFC-së. Ngjarja, me emrin “UFC Freedom 250”, organizohet si pjesë e festimeve për 250-vjetorin e pavarësisë së Shteteve të Bashkuara.
Arenë prej çeliku, 28 metra e lartë, është ndërtuar për të akomoduar rreth 4,000 spektatorë, ndërsa dhjetëra mijëra të tjerë pritet ta ndjekin përmes ekraneve gjigante të vendosura në zonën pranë Shtëpisë së Bardhë. Sipas BBC-së, Trump e ka cilësuar eventin si “shfaqjen më të madhe në tokë” dhe e ka paraqitur atë si një simbol të “shpirtit luftarak amerikan”.
Organizimi i një ndeshjeje UFC në rezidencën presidenciale ka shkaktuar reagime të forta. Kritikët thonë se përdorimi i Shtëpisë së Bardhë për një spektakël sportiv me karakter të fortë komercial dhe politik është i papërshtatshëm. Një grup opozitar ka paraqitur edhe një padi federale, duke e quajtur eventin “një keqpërdorim të thellë të monumenteve kombëtare”.
Ngjarja shihet si kulm i një marrëdhënieje të gjatë midis Trump dhe presidentit të UFC-së, Dana White. Miqësia e tyre daton që nga viti 2001, kur Trump pranoi të organizonte evente të UFC-së në kazinonë e tij në Atlantic City, në kohën kur sporti përballej me kundërshtime të forta politike dhe ndalime në shumë shtete amerikane.
Përgatitjet për eventin, përfshirë ndërtimin e arenës dhe instalimin e ekranëve të mëdhenj, synojnë të sigurojnë praninë fizike të mijëra spektatorëve dhe audiencën më të gjerë përmes transmetimeve ose shikimit në hapësirat pranë Shtëpisë së Bardhë. Ngjarja pritet të jetë një moment i dukshëm publik në kuadër të aktiviteteve për përvjetorin e pavarësisë, por po ashtu ka nxitur debat ligjor dhe etik rreth përdorimit të hapësirave dhe simbolikës së rezidencës presidenciale.
