PEQIN- Një 8-vjeçar ka humbur jetën pak ditë më parë pasi u përplas nga një automjet në aksin Elbasan-Peqin. I mituri po çonte lule te varri i mamasë, kur u përplas për vdekje nga makina.
Ndërkohë paraditen e sotme, banorët e zonës kanë bllokuar qarkullimin në aksin rrugor në shenjë proteste për mungesën e sigurisë rrugore, ku kanë kërkuar reagimin e autoriteteve. Ata mbanin në duar pankarta me shkrimet “Mbroni jetën e fëmijëve”, “Kufizues bordure në rrugë”, “Na siguroni jetën”, “Të merren masa për kufizimin e shpejtësisë”, etj.
Protestuesit kanë kërkuar që në zonen e banuar të vendosen kufizues shpejtësie dhe të ketë polici në hyrje të rrugës pranë shkollë.
“Të bëhet vijëzimi i rrugës, bordure në të tre krahët e rrugës. Të jetë me ndricim, kanë ndodhur edhe në raste të tjera. Shpejtësia është 150, tabela është 30/km/h. Duhet të përdorin dicka për ulje shpejtësie. Ecin mbi 100 në orë, policia nuk rri këtu. S’respektojnë asnjë sinjalistikë. Kemi frikë të dalim nga pianecët, maunat. Shteti të vërë dorë, 20 km/h. s’është hera e parë, e disata.”, është shprehur një nga banorët.
