Dalja e Monika Kryemadhit nga GJKKO u shoqërua me batuta për “radarët”, pasi gazetarja e Top Channel, Anila Hoxha, e pyeti për deklaratën e saj se ishte e zhgënjyer për “fikjen e radarëve”. Kryemadhi, me ironi, tha se “nuk i fiku njeri për dashurinë për mua radarët” dhe shtoi sërish sarkazëm: “Vlora ishte beqare, moj motër, unë jam me tre kalamaj”.
Në përgjigje të pyetjes nëse po fajësonte ish-bashkëshortin, Kryemadhi tha se Ilir Meta “i ndizte radarët se kishte hallin e Shqipërisë, të Kushtetutës”, duke iu referuar edhe momentit kur, sipas saj, ai “puthte Kushtetutën”. Përgjatë intervistës, kur u pyet për rolin e grave në raste të forta dhe për faktin që çështja rrotullohej rreth emrit të saj, Kryemadhi deklaroi se ishte shumë e zhgënjyer, sepse, sipas saj, Vlora i fikte radarët për Gysin.
Kryemadhi theksoi se dosja ndaj tyre lidhet me çështjen e inceneratorëve dhe, sipas saj, nuk synon drejtësi të vërtetë, por linçim të njerëzve: “Për t’i futur në një kafaz dhe ta mbash në një izolim total.” Ajo u shpreh se e gjithë dosja rrotullohet rreth saj dhe se në të nuk ka asnjë firmë apo komunikim të Ilir Metës. Sipas Kryemadhit, tre seksione që paraqiten në akuzë kanë dalë nga telefoni, ku Ilir Meta është “zero në komunikim”, ndërsa Edi Rama është personi kryesor që ka firmosur dhe ka qenë në kontakt me të më shumë se Meta për sa i përket veprimtarisë. Ajo vuri në dukje se Rama nuk është pyetur dhe nuk është marrë i pandehur.
Kryemadhi krahasoi trajtimin e të pandehurve në vend me rastet në Europë, duke thënë se “Terroristët në Europë ulen në bankë krah avokatit, këtu mbyllen në kafaz.” Ajo përfundoi se nuk është dhe nuk do të pajtohet me Metën, duke shtuar se “Jeta vazhdon”. Në repetimin e batutave rreth radarëve, ajo përsëriti se tashmë nuk “i fik njeri radar” dhe se nuk do t’i hyjë më punës së tilla. Top Channel.
