Në kuadër të planit të masave për parandalimin e aktiviteteve kriminale, gjatë 12 orëve të fundit janë evidentuar dhe goditur dy raste të lëvizjes me armë zjarri dhe lëndë narkotike, si dhe një rast i mbajtjes së armëve të ftohta. Forca e Posaçme “Shqiponja”, në bashkëpunim me Sektorin për Hetimin e Narkotikëve të DVP Durrës dhe patrullat e komisariateve, realizuan kontroll më të gjerë bazuar në informacione për shtetas që posedonin armë zjarri, armë të ftohta dhe lëndë narkotike.
Gjatë kontrolleve në Sukth, është ndaluar një automjet me tre shtetas, ku u gjet një armë zjarri kallashnikov, tre karikatorë dhe 17 fishekë. Drejtuesi i mjetit, S. M., i cili është 29 vjeç, gjatë kontrollit fizik u kap me një sasi lënde narkotike të dyshuar kanabis. Në kuadër të hetimeve, u kontrollua edhe banesa e shtetasit J. H., ku u zbulua një sasi armësh të ftohta, përkatësisht dy mjete prerëse dhe një dorezë metalike.
Si rezultat, u arrestuan në flagrancë S. M. si dhe dy pasagjerët e tij, F. S. dhe B. B., të dy 25 vjeç. Po ashtu, J. H. u arrestua për mbajtje armësh të ftohta. Hetimet për dokumentimin e veprimtarisë penale të këtyre shtetasve vazhdojnë.
Në një rast tjetër, gjatë kontrolleve në lagjen nr. 14, policia ndaloi një automjet të drejtuar nga shtetasi Z. K., ku u gjet një armë zjarri pistoletë me krehër dhe gjashtë fishekë. Ky i fundit, 20 vjeç, u arrestua në flagrancë. Materialet për këtë rast iu referuan Prokurorisë, ndërsa filloi procedimi penal gjithashtu edhe për shtetasin M. B., i cili dyshohet se kishte dijeni për rastin por nuk e kishte raportuar.
Materialet procedurale janë kaluar Prokurorisë së Durrësit për veprime të mëtejshme. Zbatimi i planit operacional të koduar “Siguria” vazhdon me intensitet.
