Mesditën e kësaj të hëne në Durrës, një i shpallur në kërkim u përfshi në një ndjekje me Policinë pasi nuk iu bind urdhrit për ndalim dhe më pas u largua nga vendi i ngjarjes. Sipas njoftimit të Policisë, rreth orës 12:45 në lagjen nr. 14, gjatë patrullimit, shërbimet e Forcës së Posaçme “Shqiponja” i bënë shenjë ndalimi drejtuesit të një automjeti që po lëvizte me shpejtësi; ai nuk u ndal dhe vazhdoi lëvizjen.
Gjatë largimit, drejtuesi i automjetit, 31-vjeçari me iniciale R.Xh., përplasi pesë automjete të parkuara, duke shkaktuar vetëm dëme materiale. Më pas ai braktisi automjetin dhe u largua me vrap nga vendi i ngjarjes. Shërbimet e Policisë nisën menjëherë ndjekjen dhe po kryejnë kontrolle intensive në zonë për lokalizimin dhe kapjen e tij.
Nga veprimet e para hetimore ka rezultuar se R.Xh. ishte shpallur në kërkim për veprën penale “Largimi i të burgosurit nga vendi i qëndrimit”, pasi kishte thyer masën e sigurisë “arrest në shtëpi” që i ishte vendosur për veprën penale “mashtrimi”. Grupi hetimor vijon punën për zbardhjen dhe dokumentimin e plotë të rrethanave të rastit.
