Të paktën shtatë persona kanë humbur në Indiana të SHBA-së pas disa ditësh stuhish dhe reshjesh të dendura që shkaktuan përmbytje të mëdha. Mes viktimave është një djalë katërvjeçar, ndërsa një çiklist 31-vjeçar gjeti vdekjen pasi ra në një pjesë të rrugës që ishte shembur për shkak të përmbytjeve. Situata është më serioze në Indianën qendrore dhe në zonën e Indianapolisit, ku reshjet e pandërprera çuan në rritje të ndjeshme të niveleve të lumenjve; Lumi i Bardhë kaloi nivele që nuk ishin regjistruar për më shumë se një shekull.
Në disa zona janë mbledhur rreth 28 centimetra shi brenda 48 orëve, duke shkaktuar përmbytje masive në zona të banuara. Qindra banorë u detyruan të largohen nga shtëpitë, ndërsa ekipet e shpëtimit përdorën varka për të arritur personat e bllokuar. Rrugë të shumta u kthyen në lumenj, ndërsa ura, ndërtesa dhe pjesë të tjera të infrastrukturës pësuan dëmtime të konsiderueshme. Edhe pse në disa zona uji nisi të tërhiqet, autoritetet paralajmërojnë se rreziku ende nuk ka kaluar.
Më shumë se 106 mijë abonentë në Indiana mbetën pa energji elektrike, një numër i ulët krahasuar me kulmin e motit të keq kur rreth 300 mijë abonentë ishin pa energji. Vala e motit ekstrem preku edhe pjesë të tjera të Midwest-it, përfshirë Illinois, Ohio dhe Kentucky, ku stuhi të fuqishme, tornado, erëra me shpejtësi të lartë dhe përmbytje të menjëhershme shkaktuan dëme. Në disa zona erërat arritën shpejtësinë 160 km/orë, duke shkulur pemë, dëmtuar ndërtesa dhe rrëzuar linjat e energjisë. Në Denver reshjet e mëdha të breshërit mbuluan rrugët dhe detyruan përdorimin e mjeteve të posaçme për pastrimin.
Guvernatori i Indianës, Mike Brown, shpalli gjendjen e jashtëzakonshme dhe u miratua ndihma federale për përballimin e pasojave. Fronti i motit të keq po zhvendoset drejt lindjes; paralajmërime për përmbytje janë në fuqi në pjesë të Virxhinias Perëndimore, Ohios juglindore dhe Kentucky-t verilindor, ku reshjet e reja mund të shkaktojnë përmbytje të menjëhershme dhe të rrezikshme. Autoritetet kërkuan që drejtuesit të mos përpiqen të kalojnë rrugët e mbuluara nga uji, pasi rrymat mund të jenë shumë të forta dhe rruga poshtë ujit të jetë dëmtuar ose shembur. Ndërkohë, ekipet e shpëtimit po kalojnë gradualisht nga operacionet emergjente te vlerësimi i dëmeve dhe rikthimi i shërbimeve, shtëpive, bizneseve dhe infrastrukturës bazë.
