Rreth mesnatës të 11 gushtit në rrugën “Gjolekë Kokona” në Tiranë u regjistrua një konflikt ndërmjet disa shtetasve, gjatë të cilit u qëllua me armë zjarri. Menjëherë pas njoftimit, shërbimet e Komisariatit të Policisë Nr. 4 shkuan në vendngjarje për të përcaktuar personat e përfshirë, përgjegjësitë dhe rrethanat e ngjarjes. Veprimet hetimore u kryen në kuadër të operacionit të koduar “Situata”.
Si rezultat i hetimeve u arrestuan: R. Z., 28 vjeç, për veprat penale “Përkrahja e autorit”, “Moskallëzimi i krimit” dhe “Prodhimi, mbajtja, blerja apo shitja pa leje e armëve të ftohta”; K. K., 31 vjeç, për veprat penale “Veprime që pengojnë zbulimin e së vërtetës” dhe “Përkrahja e autorit të krimit”; si dhe S. F., 24 vjeç dhe R. F., 34 vjeç, për veprën penale “Veprime që pengojnë zbulimin e së vërtetës”. Gjithashtu, në gjendje të lirë u proceduan katër shtetas të tjerë për veprën penale “Moskallëzimi i krimit”.
U shpallën në kërkim dy persona: F. F., 32 vjeç, për veprat penale “Vrasja me dashje”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”; dhe C. B., 32 vjeç, për veprat penale “Moskallëzimi i krimit” dhe “Përkrahja e autorit të krimit”. Forcat e rendit po punojnë për kapjen e dy shtetasve të shpallur në kërkim dhe për dokumentimin me prova ligjore të rrethanave të ngjarjes.
Sipas veprimeve hetimore të deritanishme dyshohet se konflikti nisi pasi shtetasi i arrestuar R. F. ka fyer një të mitur që ishte më pas i proceduar në gjendje të lirë. Si pasojë, i mituri, 17 vjeç, dhe miq të tij u përfshinë në një përplasje fizike me R. F., vëllanë e tij S. F. dhe miq të këtyre të fundit. Më pas, i mituri dhe miqtë e tij shkuan me motomjete te banesa e vëllezërve; aty dyshohet se është qëlluar me armë zjarri drejt motomjeteve nga vëllai i shpallur në kërkim, F. F., pa shkaktuar dëmtime personale. Materialet procedurale i janë referuar Prokurorisë së Tiranës për veprime të mëtejshme. Top Channel.
