Një 40-vjeçar i shpallur në kërkim lidhur me vrasjen e dyfishtë të ndodhur më 26 prill në fshatin Balldren të Lezhës u arrestua në Mal të Zi dhe u deportua drejt Shqipërisë, njofton Policia e Shtetit. Shtetasi, i identifikuar me inicialet B. K., banues në Torovicë, dyshohet për veprën penale “Përkrahja e autorit të krimit”, kryer në bashkëpunim, pasi policia thotë se e ka fshehur automjetin që u përdor nga autorët pas ekzekutimit të bashkëshortëve Kreshnik dhe Gentiana Mujeci.
Policia sqaron se falë informacionit të saj për vendndodhjen e personit në fjalë dhe shkëmbimit në kohë reale të informacionit me autoritetet malazeze, Policia e Malit të Zi lokalizoi dhe kapë atë në Ulqin. Menjëherë pas kapjes, i dyshuari u deportua në Pikën e Kalimit Kufitar Muriqan, ku iu dorëzua shërbimeve të Policisë Kufitare shqiptare dhe më pas u shoqërua nga shërbimet e Drejtorisë Vendore të Policisë Lezhë.
Në vijim të veprimeve hetimore nga specialistët për Hetimin e Krimeve Kundër Personit në DVP Lezhë, u bë ndalimi i B. K. Sipas njoftimit, Gjykata e Lezhës kishte dhënë vendimin për t’i caktuar masën e sigurisë “Arrest në burg” në kuadër të hetimeve për ngjarjen ku u vranë me armë zjarri shtetasit K. M. dhe G. M., bashkëshortë.
Hetimet kanë nxjerrë se i dyshuari dyshohet ta ketë ndihmuar autorët duke fshehur në banesën e tij automjetin e përdorur prej tyre pas kryerjes së krimit. Automjeti u gjet dhe u sekuestrua gjatë kontrolleve të kryera nga policia në kuadër të hetimeve.
Materialet procedurale, njofton Policia, iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme procedurale.
