Deputetët e Kuvendit të Kosovës do të mblidhen më 9 shtator për të konstituuar institucionin, në përpjekje pas thirrjes së vazhdimit të seancës nga kryesuesi Avni Dehari. Megjithatë, partitë opozitare janë mbledhur edhe njëherë këtë të shtunë në sallën e seancave në shenjë proteste ndaj asaj që ata e konsiderojnë shkelje të afatit kushtetues.
Kryetari i Partisë Demokratike të Kosovës, Bedri Hamza, kritikoi thirrjen e vazhdimit të seancës konstituive për 9 shtator, duke theksuar se nuk po shkelen vetëm afatet kushtetuese por edhe afati sipas interpretimit që Vetëvendosja vetë ka vendosur. “Tash vazhdimi i seancës konstituive është thirrur për 9 shtator, pas afatit prej 30 ditëve që ka përcaktuar vetë Vetëvendosja”, tha Hamza. Në shenjë kundërshtimi ndaj, siç tha ai, shkeljeve kushtetuese të kryera nga Vetëvendosja, Hamza paralajmëroi masa të tjera veprimi: “Do të veprojmë me përgjegjësi, me vendosmëri dhe me të gjitha mjetet demokratike dhe institucionale që na i jep rendi kushtetues i Republikës së Kosovës”.
Përveç PDK-së, në sallën e Kuvendit ishin edhe përfaqësues të Aleancës, të cilët gjithashtu kritikuan veprimet e partisë fituese të zgjedhjeve, Lëvizjes Vetëvendosje. Deputeti i Aleancës, Burim Ramadani, deklaroi se kryetari Kurti, pa pyetur askënd, ka vazhduar me shkelje të Kushtetutës dhe të rendit kushtetues.
Sipas aktgjykimit të Gjykatës Kushtetuese të vitit 2025, Kuvendi i Kosovës duhet të konstituohet brenda 30 ditëve pas certifikimit të rezultatit të zgjedhjeve. Ky afat përfundoi më 7 gusht, ndërsa parlamenti mbetet i pakonstituar. Lëvizjet e fundit rreth thirrjes së seancës për 9 shtator dhe reagimet e partive opozitare pasqyrojnë mosmarrëveshjet mbi interpretimin dhe respektimin e afateve kushtetuese lidhur me konstituimin e parlamentit. Top Channel.
