Një ditë pas deklaratës së Sali Berishës se partitë e opozitës po punojnë për një qëndrim të unifikuar që synon ndryshimin e sistemit zgjedhor në proporcional kombëtar me lista të hapura, bashkëkryetari i Reformës Zgjedhore nga radhët e Partisë Socialiste, Damian Gjiknuri, u shpreh se mazhoranca është e gatshme të ulet në negociata politike. Në një intervistë për Top Channel dhe gazetaren Elda Menga, Gjiknuri theksoi se reforma zgjedhore bazohet në rekomandimet e OSBE/ODIHR-it, por se për çështjen e sistemit zgjedhor nuk ka një rekomandim të përcaktuar.
Gjiknuri tha se, megjithëse nuk ka parë ende një propozim konkret nga opozita, ka dëgjuar se një pjesë e saj po përpiqet të unifikojë pozicionin për një sistem proporcional kombëtar. Ai nënvizoi se sistemi zgjedhor është përcaktuar në Kushtetutë dhe se çdo ndryshim të saj do të kërkojë ndërhyrje kushtetuese. Për këtë arsye, Gjiknuri propozoi krijimin e një Komisioni të Reformës Kushtetuese ku të ulen palët përkatëse dhe të rishikojnë jo vetëm sistemin zgjedhor, por edhe formimin e Kuvendit dhe numrin e mandateve.
Ai përmendi se Partia Socialiste ka një propozim publik për uljen e numrit të deputetëve dhe insistoi që Komisioni të shqyrtojë njëkohësisht çështjen e sistemit zgjedhor dhe propozimet e mazhorancës për reduktimin e mandateve. Sipas tij, çdo lloj propozimi për ndryshime duhet të konsiderohet dhe shqyrtohet nga të gjitha palët që do të jenë pjesë e komisionit.
Gjiknuri theksoi gjithashtu se ndryshimi i sistemit zgjedhor është një çështje e sovranitetit politik dhe vullnetit të forcave kryesore politike, duke shtuar se mazhoranca pranon të ulemi për ta shqyrtuar dhe duke marrë parasysh edhe propozimet e saj. Ai përsëriti gatishmërinë për negociata në rast se opozita paraqet zyrtarisht një propozim që kërkon ndryshim kushtetues. Teksti i intervistës u publikua nga Top Channel.
