Partia Demokratike zhvillon sot punimet e Kuvendit Kombëtar, ku delegatët do të votojnë fillimisht për përbërjen e Komisionit të Drejtimit të Punimeve dhe Sekretariatin Teknik. Komisioni që do të drejtojë punimet përbëhet nga Ivi Kaso si kryetare dhe anëtarët Floriana Garo, Bardh Spahia, Eliona Shkreli dhe Nada Meçorapaj. Pas miratimit të tyre me votim të hapur, Kuvendi do të nisë zyrtarisht aktivitetin, i cili do të hapet me fjalën e kryetarit të Partisë Demokratike, Sali Berisha. Regjistrimi i delegatëve ka nisur.
Një nga pikat kryesore të mbledhjes është prezantimi i tetë amendamenteve statutore, të paraqitura nga kreu i grupit parlamentar demokrat, Gazmend Bardhi, të cilat do t’i nënshtrohen më pas votimit të delegatëve. Ndryshimet e propozuara prekin edhe procesin e përzgjedhjes së kandidatëve për deputetë dhe kryetarë bashkish. Statuti i ri parashikon krijimin e një strukture të posaçme brenda partisë, e cila do të filtrojë kandidaturat përpara se ato t’i nënshtrohen votës së anëtarësisë. Dokumenti synon gjithashtu adresimin e problematikave të listave të anëtarësisë përmes dixhitalizimit dhe përditësimit të tyre çdo dy vjet.
Gjatë punimeve do të zhvillohet edhe votimi për 200 anëtarët e rinj të Këshillit Kombëtar. Ky proces do të realizohet në ambientet e Pallatit të Kongreseve, paralelisht me diskutimet dhe fjalimet e parashikuara në axhendë. Pas konstituimit, Këshilli Kombëtar do të ketë detyrën e shqyrtimit dhe votimit të propozimeve të Sali Berishës për ekipin e ri drejtues të Partisë Demokratike.
Kuvendi Kombëtar mblidhet një javë pas zgjedhjeve për kryetarin e partisë, në të cilat u rizgjodh Sali Berisha, si kandidati i vetëm në garë. Përparimi i procedurave përfshin miratimin e komisionit drejtues, diskutimin dhe votimin e amendamenteve statutore, dixhitalizimin e listave të anëtarësisë dhe zgjedhjen e anëtarëve të rinj të Këshillit Kombëtar, të cilët do të jenë përgjegjës për vendimmarrjet lidhur me ekipin drejtues të partisë.
