Teksa na ndajnë vetëm pak orë nga çelja e fushatës elektorale të Partisë Demokratike, e cila fillon në orën 19:00, në sheshin “Nënë Tereza” po bëhen përgatitjet e fundit për të pritur mbështetësit demokratë.
Do të kemi një fushatë “alla-Donald Trump”, pasi demokratët presin të ndjekin modelin e Presidentit Donald Trump në fushatën e tij presidenciale.
Në podium nuk do të jetë vetëm kryedemokrati Sali Berisha, por do të jetë dhe një skenografi tërësisht me të rinj, të cilët do të jenë dekori i Berishës në podium, ku do të mbajë dhe fjalën.
Surpriza e kryedemokratit në këtë miting, do të jetë strategu i tij, Chris LaCivita, i cili tashmë e ka dhënë mesazhin në rrjetet sociale, ku ka postuar videon e një bufi që gllabëron një mi, duke “thumbuar” kryeministrin Rama.
Pritet për t’u parë cili do të jetë mesazhi i LaCivita përpara demokratëve, të cilët do të ulen përreth sheshit “Nënë Tereza”, ndërkohë ky event pritet që t’i paraprihet një eventi të të rinjve, që do të vendosin disa pamje në shesh.
Ditën e nesërme pritet që Berisha të paraqesë dhe programin qeverisës nëse do të rikthehet në pushtet.
Nga ana tjetër, janë dhe partitë e tjera që startojnë fushatën, përjashtuar PSD dhe Koalicionin Djathtas, pasi e konsiderojnë fushatën e tyre të nisur përpara disa ditësh.
“Mundësia” e Agron Shehajt e ka hapur fushatën rreth orës 08:00 me një tur, ku niset me autobus nga Shkodra dhe duke përfunduar në Sarandë. Ditën e nesërme do të shpalosë programin qeverisës nëse do të arrijë të fitojë zgjedhjet.
Ditën e nesërme do të nisë fushatën “Nisma Shqipëria Bëhet” në orën 18:00 në Vlorë, në sheshin para stadiumit “Flamurtari”.
Partia e Arlind Qorit, “Bashkë”, pritet që ta hapë fushatën në Fier, ditën e diel, ora 10:30, në teatrin “Bylis”.
Koalicioni Euro-Atlantik i Lulzim Bashës do ta nisë fushatën më 12 prill.
