Një pasagjer i një fluturimi të Flydubai rrëfeu momentet e tensionuara gjatë një incidenti në bord, duke treguar se ai dhe disa udhëtarë ndërhynë për të ndaluar një person të dyshuar që tentoi të sulmonte ekuipazhin. Yaniv Hayoun, i cili u takua të mërkurën me kryeministrin izraelit Benjamin Netanyahu, tha se përpiqej të hynte në kabinën e pilotëve pasi kishte kuptuar se njëri prej tyre ishte i plagosur dhe ndodhej pranë derës së kabinës.
Sipas rrëfimit të tij, pasi arriti të futet brenda, pa të dy pilotët jashtë vendeve të tyre, ndërsa i dyshuari qëndronte pranë panelit të komandimit dhe dukej se po përpiqej të ndërhynte në kontrollet e avionit. Hayoun tha se bëri thirrje për ndihmë dhe “thirra disa izraelitë që ndodheshin në bord dhe dy persona të tjerë erdhën. E mbajtëm të shtrirë.” Ai tregoi se e kapte për fyti të dyshuarin dhe e nxori nga kabina, ndërsa menjëherë iu kthye komandave të avionit.
Hayoun përshkroi se veprimet e tij për të rimarrë kontrollin e aeroplanit zgjatën vetëm disa sekonda: “U ktheva, kapa komandat dhe fillova t’i tërhiqja pas,” tha ai. Ai shprehu frikën se situata mund të ishte përkeqësuar nëse avioni do të hynte në hapësirën ajrore izraelite pa qenë nën kontroll. I pyetur si e dinte se çfarë të bënte me komandat e avionit, Hayoun u përgjigj me humor se ishte frymëzuar nga një serial televiziv: “Shikoj ‘Air Crash Investigation’, zoti kryeministër – vërtet!”
Rrëfimi i Hayoun u bë gjatë takimit me kryeministrin Netanyahu, ku u diskutua ndërhyrja e pasagjerëve për të ndaluar personin e dyshuar dhe për të ndihmuar në rikthimin e kontrollit të avionit.
