Kryenegociatorja e Shqipërisë në procesin e integrimit në Bashkimin Europian, Majlinda Dhuka, bëri thirrje për dialog dhe ulje të tensioneve në ditën e tretë të protestës së dhunshme që ka përfshirë Tiranën. Ajo theksoi se Shqipëria është shumë pranë integrimit në BE dhe se kjo është aspirata e të gjithë shqiptarëve.
Dhuka deklaroi se “Bashkimi Europian është destinacioni ynë – Familja Europiane është përkatësia jonë çdo ditë, edhe sot!” dhe nënvizoi se protesta dhe zëri i qytetarëve kërkojnë reflektim me përgjegjësi të lartë mbi Shqipërinë europiane që vendi po ndërton. Sipas saj, ky reflektim duhet të ndërtosh një shtet ku zëri i qytetarëve dëgjohet, institucionet respektohen dhe shteti i së drejtës është mbi çdo interes.
Ajo sqaroi se të jesh europian do të thotë të kesh guximin të ngresh zërin, urtësinë të respektosh ligjin dhe forcën të mos e kthesh dallimin në largësi mes njerëzve. Dhuka shtoi se paqa nuk është heshtje, as urtësia indiferencë, por janë forca për të mbrojtur vlerat europiane, respektin njerëzor dhe Shqipërinë.
Në fjalën e saj u përsërit se Shqipëria i përket familjes europiane si për shkak të aspiratës së qytetarëve, ashtu edhe për shkak të vlerave që shoqëria zgjedh të kultivojë çdo ditë. Ajo theksoi se vendi është më pranë se kurrë për përmbushjen e aspiratës europiane mbi 30-vjeçare dhe e cilësoi këtë si një moment historik për të gjithë.
Në përmbyllje, Dhuka bëri thirrje për bashkëpunim dhe ndërtim të urave të dialogut: “Së bashku, lutem, të ndërtojmë urat e DIALOGUT dhe çdo hap drejt Familjes së Përkatësisë – Bashkimit Europian”.
