Céline Dion u rikthye në skenë në Paris, ku u përlot gjatë performancës së parë live pas më shumë se gjashtë vitesh, pas një periudhe të gjatë tërheqjeje nga aktiviteti muzikor për shkak të problemeve shëndetësore. Para një audience të tejmbushur, këngëtarja kanadeze, dukshëm e emocionuar, tha se ishte “e mahnitshme që jemi të gjithë bashkë” dhe se kishte bërë një premtim për t’u kthyer në skenë, duke falënderuar fansat për mbështetjen dhe durimin e tyre.
Performanca e saj e fundit e plotë daton në vitin 2020, si pjesë e turneut “Courage”. Ajo anuloi pjesën e planifikuar të turneut në Amerikën e Veriut në 2022, pasi u diagnostikua me SPS (Stiff Person Syndrome), një çrregullim neurologjik autoimun që shkakton ngurtësi të muskujve dhe spazma të dhimbshme, me simptoma të ndryshme në intensitet. Sëmundja rrjedh nga një reagim i gabuar i sistemit imunitar që sulmon qelizat nervore dhe aktualisht nuk ka një kurë të njohur.
Pas diagnozës, Dion u tërhoq kryesisht nga skena dhe ka pasur vetëm disa shfaqje të veçanta vitet e fundit: një event virtual bamirësie për punonjësit e shëndetësisë gjatë pandemisë së COVID-19 në 2020, performancën në ceremoninë e hapjes së Lojërave Olimpike të Parisit në 2024 ku këndoi “Hymne à l’amour” të Édith Piaf, dhe paraqitjen në përfundim të sfilatës së stilistit Elie Saab në Riad po atë vit.
Koncerti në Paris shënon nisjen e një serie prej 26 shfaqjesh në “Plenitude Arena”, të planifikuara nga 12 shtatori 2026 deri më 29 maj 2027. Numri i koncerteve u rrit nga 10 në 26 për shkak të kërkesës së lartë; sipas raportimeve, rreth 1.17 milionë bileta u shitën brenda pak orësh nga nxjerrja në treg, ndërsa më shumë se 9 milionë fansa tentuan t’i blinin ato. Gjatë këtyre shfaqjeve Dion pritet të interpretojë disa nga hitet e saj më të njohura, përfshirë baladën “My Heart Will Go On” si dhe këngë në anglisht dhe frëngjisht si “It’s All Coming Back to Me Now”, “The Power of Love” dhe “Pour que tu m’aimes encore”.
Rikthimi përbën një kapitull të ri në karrierën e këngëtares 58-vjeçare, e cila vijon të performojë përballë sfidave që i shkakton sëmundja e rrallë.
