Papa Leone XIV ka përcjellë mesazhin e tij të parë pas ndërhyrjes kirurgjikale në Romë, duke falënderuar besimtarët katolikë për lutjet dhe mbështetjen gjatë periudhës së vështirësive shëndetësore. Mesazhi iu drejtua pjesëmarrësve të një simpoziumi me rastin e 10-vjetorit të dokumentit Amoris laetitia, të hartuar nga paraardhësi i tij, Papa Françesku. “Siç e dini, gjatë këtyre ditëve nuk kam mundur të jem mes jush,” shkroi Ati i Shenjtë, dhe shprehu mirënjohje për lutjet dhe angazhimin e pjesëmarrësve.
Papa vlerësoi shkëmbimin e përvojave dhe dëgjimin e kujdesshëm mes pjesëmarrësve, duke i konsideruar ato si një dhuratë për Kishën. Në përfundim të mesazhit, ai kërkoi që besimtarët të vazhdojnë të luten për të, duke theksuar se edhe ai lutet për ta.
Ekipi mjekësor bëri të ditur se atij i është diagnostikuar adenokarcinoma pulmonare, një formë e zakonshme e kancerit të mushkërive. Gjatë një ndërhyrjeje kirurgjikale rreth 90-minutëshe në Romë, mjekët hoqën lobin e poshtëm të njërës prej mushkërive. Mjekët Luigi Carbone dhe Stefano Margaritora thanë se rikuperimi po ecën sipas pritshmërive; Papa ka mundur të ecë në ambientet e dhomës së tij dhe ka konsumuar mëngjesin dhe drekën.
Gjatë fundjavës, Papa njoftoi besimtarët në Sheshin e Shën Pjetrit për ndërhyrjen e planifikuar, duke bërë të ditur se masa e zbuluar në mushkëri ishte identifikuar në një fazë të hershme. Për shkak të trajtimit dhe rikuperimit, Papa Leone XIV ka anuluar të gjitha daljet publike deri më 20 tetor.
Megjithatë, sipas informacionit të publikuar nga ekipi mjekësor, ai pritet të zhvillojë muajin e ardhshëm një udhëtim të gjatë në Amerikën e Jugut. Realizimi i këtij udhëtimi do të varet nga ecuria e gjendjes së tij shëndetësore dhe këshillat e mjekëve.
