Pas betimit në prani të Presidentit të Republikës, Bajram Begaj, Klodiana Spahiu mori zyrtarisht detyrën e ministres së Shëndetësisë dhe Mirëqenies Sociale. Në takimin prezantues, në mesazhin e saj të parë si ministre ajo deklaroi se në qendër të punës së saj do të jetë qytetari.
Spahiu njoftoi hapjen e një zyre të dedikuar për publiku, që do të funksionojë që nga ora 08:00 e mëngjesit, me qëllim të adresimit dhe dëgjimit të problematikave që nuk janë zgjidhur më parë. “Duke filluar që nesër do të kemi një zyrë të hapur që në orën 08:00 të mëngjesit, për të adresuar dhe dëgjuar një problematikë që nuk është zgjidhur diku tjetër,” tha ajo, duke theksuar se për këtë qëllim do të angazhohen të gjithë punonjësit e ministrisë. Ministrja shtoi se të njëjtën qasje do ta ndjekin edhe institucionet shëndetësore terciare pranë ministrisë, dhe kërkoi që çdo herë që shfaqen problematika apo mungesa, ato të vijnë duke u pakësuar dhe përmirësuar, pasi ky është një proces në evoluim.
Ajo falënderoi stafet e sistemit shëndetësor për punën dhe kontributin e tyre dhe prezantoi vizionin e saj për drejtimin e sektorit, si dhe vijimin e objektivave për përmirësimin e shërbimeve shëndetësore. Spahiu theksoi angazhimin për vendosjen e objektivave konkrete, duke i përcaktuar si afatshkurtra dhe afatmesme, me afate të përcaktuara për realizimin e tyre.
Ministrja përmendi përvojën e saj të gjatë në sektorin e shëndetësisë, duke thënë se ka 13 vite që zhvillon “betejën e shëndetësisë” së bashku me stafin. Ajo vuri në dukje se sfidat janë të shumëfishta dhe identifikoi besimin si sfidën e parë, duke kërkuar që secili nga punonjësit ta ketë rindërtimin e besimit si qëllim kryesor. Klodiana Spahiu, mjeke kardiologe e titulluar “Doktor i Shkencave Mjekësore”, zëvendësoi në detyrë Evis Salën, e cila dha dorëheqjen pak ditë më parë.
