Gjirokastra po afirmohet si destinacion në rritje për avioturizmin në Shqipëri. Pas mbërritjes së avionit të parë të këtij sezoni me fluturim direkt nga Piza dhe në pritje të fluturimeve të tjera nga Bari, qyteti po organizon edhe aktivitete të veçanta që tërheqin turistë të huaj. Në periudhën 30 prill–3 maj, Instituti Italian i Parashutizmit zhvillon hedhje me parashutë në aerodromin e Gjirokastrës, një iniciativë që synon diversifikimin e ofertës turistike dhe promovimin e vlerave kulturore e historike të qytetit përmes avioturizmit.
Mbi 40 parashutistë dhe staf mbështetës marrin pjesë në aktivitet, ndërsa avioni ka ndaluar në Gjirokastër për herë të tetë, duke shtuar fokusin ndaj turizmit ajror. Pjesëmarrësit e huaj shprehen entuziazëm dhe vlerësojnë përvojën dhe qytetin. Një prej tyre shprehet: “Jemi shumë të lumtur që kemi ardhur në Shqipëri. Kemi ardhur një herë në vit dhe shpresojmë të vijmë dy herë brenda vitit. Gjirokastra është një qytet i mrekullueshëm që sigurisht u pëlqen shumë italianëve. Takojmë shumë prej tyre në qytet dhe na bëhet qejfi.”
Antonela Bossio, e cila viziton për herë të tretë Gjirokastrën, thotë: “Është me të vërtetë një ngjarje shumë e bukur. Ka një panoramë të jashtëzakonshme, keni një qytet dhe kala të mrekullueshme. Është një mundësi shumë e mirë.” Një tjetër pjesëmarrës thekson: “Është hera e katërt që vij në Gjirokastër. Është gjithmonë emocion të vish dhe të bësh një aktivitet që të pëlqen. Ndihemi shumë mirë këtu.”
Gjatë ditëve të ngjarjes do të zhvillohen edhe aktivitete të tjera të lidhura me parashutizmin, të cilat do të jenë të hapura edhe për persona të interesuar, duke u mundësuar atyre të përjetojnë nga afër emocionet e këtij sporti. Aktiviteti shoqërohet me praninë e turistëve të huaj dhe synon të rrisë tërheqjen e Gjirokastrës si destinacion ajror dhe turistik, duke u përpjekur të promovojë elementët historikë dhe kulturorë të qytetit.
